АҚШ ва ЕИ вакиллари учрашуви кўнгилдагидек ўтмади – FT

АҚШ делегацияси ва Европа расмийлари ҳамда элчилари ўртасида Россия-Украина можаросини тартибга солиш бўйича учрашув “кўнгилдагидек” ўтмаган. Бу ҳақда “Financial Times” нашри хабар берди.

Маълумотларга кўра, музокаралар кеча, 21 ноябрь куни Киевда АҚШнинг Украина ишларидаги вакили Жули Девиснинг резиденциясида бўлиб ўтган. АҚШ Армияси вазири Дэни Дрисколлнинг элчилар ва Европа Иттифоқи давлатлари расмийларига айтишича, Америка томони оптимистик кайфиятда бўлиб, мослашувчанлик кўрсатишни режалаштирмаяпти.

Учрашув иштирокчиларининг нашрга айтишича, Дрисколл йиғилишга кечикиб келган ва кўп ҳақоратли сўзлардан фойдаланган.

“Бизда тинчлик учун кам вақт бор — Президент Трамп ҳозир тинчлик хоҳлайди. Ошхонада қанча кўп ошпаз бўлса, шунча қийин бўлади”, дейди Дрисколл.

Шунингдек, у Украина Президенти Владимир Зеленский жорий йилнинг 27 ноябригача “Трампнинг тинчлик режасини” имзолаши кераклигини таъкидлаган.

“АҚШ Қуролли Кучлари Украинани яхши кўради ва уни қўллаб-қувватлайди, лекин америкалик ҳарбийларнинг ҳалол баҳосига кўра, Украина жуда қийин вазиятда”, дея қўшимча қилган у Европа расмийлари билан учрашувда

Эслатиб ўтамиз, аввалроқ АҚШ Президенти Дональд Трамп Оқ уйнинг Овал кабинетида журналистлар билан бўлиб ўтган суҳбатда  Украина Президенти Владимир Зеленский АҚШнинг Россия билан можаро бўйича тинчлик режасини тасдиқлашга мажбур ва унинг бошқа йўли ҳам йўқлигини айтганди.