АҚШ ва Эрон ўртасидаги сулҳ муддати узайтирилди

АҚШ Президенти Дональд Трамп Эрон билан ўт очишни тўхтатиш режимини узайтириш ҳақида буйруқ берди. Бу ҳақда у ўзининг Truth Social тармоғида ёзиб қолдирди.

Унинг айтишича, Покистон раҳбарияти воситачилик қилиб, АҚШдан Эронга зарбаларни вақтинча тўхтатишни сўраган. Шу сабаб Трамп АҚШ Қуролли кучларига Ҳормуз бўғозидаги блокадани давом эттириш, жанговар тайёргарликни сақлаб туриш ва музокаралар якунига қадар сулҳни узайтиришни буюрган.

8 апрель куни тузилган вақтинчалик сулҳ 21 апрель куни ўз кучини йўқотган эди.

Аввалроқ, Эрон Покистонда АҚШ билан ўтказилиши режалаштирилган музокараларнинг иккинчи босқичида қатнашишдан бош тортган. Шу билан бирга, АҚШ вице-президенти Жей Ди Вэнснинг сафар ҳам номаълум муддатга кечиктирилган.

Ўтган ҳафта Трамп АҚШ делегацияси Исломободга йўл олишини ва у ерда Эрон билан янги музокаралар ўтказилишини билдирганди. Делегацияга айнан Вэнс бошчилик қилиши режалаштирилган эди.

8 апрель кунги икки ҳафталик сулҳ арафасида томонлар ўзаро талаблар рўйхатини тақдим этган.

АҚШ таклифида 15 та банд бўлиб, улар орасида:

• Ҳормуз бўғозини очиш;
• Эроннинг ракета дастурини чеклаш;
• ядровий дастурдан тўлиқ воз кечиш (барча объектларни демонтаж қилиш ва бойитилган уранни Халқаро атом энергияси агентлигига топшириш);
• минтақадаги иттифоқчи кучларни қўллаб-қувватлашни тўхтатиш каби талаблар бор. Эвазига АҚШ санкцияларни бекор қилиш ва Эроннинг тинч ядровий энергетикасини ривожлантиришга ёрдам беришни ваъда қилган.

Эрон таклифи эса 10 банддан иборат бўлиб, унда:

• АҚШнинг ҳужум қилмаслик кафолати;
• Ҳормуз бўғози устидан назоратни тан олиш;
• уран бойитиш ҳуқуқини эътироф этиш;
• барча санкцияларни бекор қилиш;
• АҚШ қўшинларини минтақадан олиб чиқиш ва ҳарбий ҳаракатларни тўхтатиш каби талаблар илгари сурилган.

Шунингдек, Эрон АҚШдан етказилган зарар учун компенсация тўлашни ҳам талаб қилган.

Эслатиб ўтамиз, аввалроқ Дональд Трамп Эрон билан сулҳ муддатини энди узайтирмаслигини билдирганди ва ҳарбий ҳаракатлар давом эттирилиши мумкинлигини инкор этмаганди.