АҚШ Украинага ўз қўшинларини юбориши мумкин

Агар Россия можарони ҳал қилишдан бош тортса, АҚШ Украинага Америка қўшинларини юбориши мумкин. Бу ҳақда АҚШ вице-президенти Жеймс Дэвид Вэнс “The Wall Street Journal” нашрига берган интервьюсида сўз очди.

Вэнснинг айтишича, агар Москва виждонан музокаралар олиб бормаса, санкциялар қўллаш ва АҚШ қўшинларини Украинага юбориш варианти столда қолади.

“Таъсир ўтказиш учун иқтисодий дастаклар бор, албатта, ҳарбий дастаклар ҳам бор”, деган у.

Вэнснинг сўзларига кўра, томонлар эришган келишув “кўпчиликни ларзага келтириши” мумкин. Вице-президентнинг таъкидлашича, АҚШ Президенти Дональд Трамп музокаралар чоғида айрим масалалар бўйича ўз фикрини ўзгартириши мумкин.

“Кўплаб формулалар ва конфигурациялар мавжуд, аммо биз Украинанинг суверен мустақилликка эга бўлиши ҳақида қайғурамиз”, деган Вэнс.

Вэнснинг айтишича, Украинанинг ҳудудий имкониятлари ва Ғарб давлатларининг Киевга хавфсизлик кафолатлари ҳақида гапиришнинг вақти ҳали келмади.

Унинг сўзларига кўра, Вашингтон Москвани жанг майдонидан кўра музокаралар столида кўпроқ нарсага эришишига ишонтирмоқчи. Вэнс, шунингдек, Украина бўйича муваффақиятли келишувдан кейин Россия билан муносабатларни тиклашни таклиф қилган.

Эслатиб ўтамиз,  12 февраль куни Брюсселда НАТО Мудофаа вазирлари йиғилишининг очилишида АҚШнинг янги Мудофаа вазири Пит Ҳегсет Америка қўшинлари Украинага жойлашмаслиги ҳақида гапирганди.

“Аниқроқ қилиб айтадиган бўлсак, АҚШ қўшинлари Россия уруш машинасини молиялаштирадиган кейинги дипломатия ва энергия нархини пасайтириш учун хавфсизлик кафолатларининг бир қисми сифатида Украинага жойлаштирилмайди. Европа хавфсизлигини таъминлаш НАТОнинг Европа аъзолари учун мажбурият бўлиши керак. Бунинг бир қисми сифатида Европа келажакдаги ҳарбий ёрдамнинг катта қисмини Украинага бериши керак”, деган Хегсет.