АҚШ Украина ва Россияга урушни тугатиш учун муддат берди – Зеленский

АҚШ Украина ва Россияга қарийб тўрт йиллик урушни тугатиш бўйича келишувга эришиш учун жорий йилнинг июнь ойига қадар муддат берган. Бу ҳақда кеча, 6 февраль куни Украина Президенти Владимир Зеленский журналистларга берган интервьюсида маълум қилди.

Президентнинг сўзларига кўра, агар белгиланган муддатда келишувга эришилмаса, АҚШ ҳар икки томонга ҳам босим ўтказиши мумкин.

“АҚШ урушни ёз фаслининг бошига қадар тугатишни талаб қилмоқда. Акс ҳолда, ҳар икки томонга ҳам мос равишда босим бўлишини таъкидламоқда”, деган Зеленский. 

Шунингдек, Украина Президенти келаси ҳафтада Украина, Россия ва АҚШ иштирокида уч томонлама музокараларнинг навбатдаги босқичи ўтказилишини билдирган. Учрашув АҚШ ҳудудида, эҳтимол Майами шаҳрида бўлиб ўтиши мумкин. Украина бу музокараларда иштирок этишини тасдиқлаган.

Қайд этилишича, июнь ойига қадар белгиланган муддат АҚШ воситачилигида Абу-Дабида ўтказилган сўнгги уч томонлама музокаралардан кейин белгиланган. Бироқ, томонлар ўз талабларидан воз кечмагани сабабли музокараларда сезиларли натижага эришилмаган.

Россия Украинадан Донбасс ҳудудидан чиқиб кетишни талаб қилмоқда. Киев эса ушбу шартни қатъиян рад этиб, бунга ҳеч қачон рози бўлмаслигини билдирган.

Эслатиб ўтамиз, аввалроқ Владимир Зеленский “France 2” телеканалига берган интервьюсида Россия билан можарода Украина Қуролли кучлари йўқотишлари 55 минг кишидан ошганини айтган эди.

Жамшидбек Амиров