Зеленский урушда қанча аскари ўлганини айтди

Россия билан можарода Украина Қуролли кучлари йўқотишлари 55 минг кишидан ошди. Бу ҳақда Украина Президенти Владимир Зеленский “France 2” телеканалига берган интервьюсида сўз очди.

“Украинада расмий маълумотларга кўра, жанг майдонида 55 минг ҳарбий ҳалок бўлган, улар орасида профессионал ҳарбийлар ҳам, сафарбар қилинганлар ҳам бор. Бу рақамга Украина “йўқолган” деб ҳисоблаган катта сонли одамлар ҳам қўшилиши керак”, деган Зеленский. 

Бир йил олдин, 2025 йил февраль ойида, Зеленский ҳалок бўлганлар сонини 46 минг деб билдирган эди.

У шунингдек, жанговар ҳаракатларни якунлаш Украина учун энг муҳим устувор вазифа эканини айтган ва фаол дипломатик ҳаракатлар ҳамда музокаралар орқали тинчликни бир йил ичида таъминлаш мумкинлигига умид билдирган. 

Президентнинг қўшимча қилишича, ҳатто ҳозирги позицияларда фронт чизиғини “музлатиш” ҳам Украина томонидан катта имтиёз бўларди, аммо у давлат мустақиллигини сақлаш мақсадида мулоқотга тайёр.

Эслатиб ўтамиз, кеча, 4 февраль куни БАА пойтахти Абу-Даби шаҳрида Украина, АҚШ ва Россия ўртасидаги уч томонлама музокараларнинг биринчи куни якунланганди. Музокаралар 4 соатдан ортиқ давом этган. Ҳозирча учрашув натижалари бўйича расмий баёнот берилмаган. 

Бу Абу-Дабида ўтказилаётган уч томонлама музокараларнинг иккинчиси ҳисобланади. Биринчи учрашув 23–24 январь кунлари бўлиб ўтган. Иккинчи босқич дастлаб 1 февралга режалаштирилган эди, аммо баъзи сабабларга кўра кечиктирилганди.