АҚШ тарихида биринчи марта қора танли аёл штат губернатори бўлади

АҚШнинг Жоржия штатида губернаторлик сайловида Демократик партия вакили Кейша Лэнс Боттомс ғалаба қозонди. У мамлакат тарихида штат губернатори этиб сайланган илк қора танли аёл бўлди. Бу ҳақда “Bild” хабар берди.

Атлантанинг собиқ мэри республикачи номзод, миллиардер Рик Жексондан кўпроқ овоз тўплаган. Жексон сайловолди кампаниясига ўз маблағидан 200 миллион доллардан ортиқ сарфлаган. Шунга қарамай, у мағлубиятини тан олган.

Боттомснинг ғалабаси Жоржия учун ҳам тарихий аҳамиятга эга. Демократлар 1998 йилдан бери биринчи марта штат губернаторлиги лавозимини қўлга киритди. Сайлов кампанияси давомида Боттомс иқтисодий муаммоларга эътибор қаратган ва Президент Дональд Трамп маъмурияти сиёсатини танқид қилган.

Ғалабасини нишонлаш маросимида у сиёсий қарашларидан қатъи назар, штатнинг барча аҳолиси манфаатларини ҳимоя қилишга ваъда берган.

“Бугун кимга овоз берганингиздан қатъи назар, мен бутун Жоржия учун губернатор бўламан”, дейди Боттомс.

Яна бир тарихий натижа Нью-Мексико штатида қайд этилган. У ерда губернаторлик сайловида Демократик партия вакили Деб Ҳааланд ғалаба қозонган. У АҚШ туб аҳолиси вакиллари орасидан штат губернатори этиб сайланган биринчи аёл бўлади.

Ҳааланд Лагуна-Пуэбло халқига мансуб. У 2018 йилда АҚШ Конгресси Вакиллар палатасига сайланган туб аҳолига мансуб илк икки аёлдан бири бўлган. Кейинчалик Жо Байден маъмуриятида ички ишлар вазири лавозимида ҳам ишлаган.

Эслатиб ўтамиз, аввалроқ Демократик партия вакили Абдул ал-Саид Мичиган штати бўйича АҚШ Сенатига ўтказилган сайловда республикачи Майк Рожерс устидан ғалаба қозониб, мамлакат тарихида илк бор Сенатга сайланган мусулмон номзод бўлгани ҳақида хабар берилган эди.