АҚШ шармандали мағлубиятга учради – Эрон

АҚШ шармандали мағлубиятга учради ва Теҳрон илгари сурган барча ўт очишни тўхтатиш шартларига рози бўлди. Бу ҳақда Эроннинг Олий миллий хавфсизлик кенгаши маълум қилди.

Мазкур баёнот Дональд Трамп томонидан эълон қилинган икки ҳафталик сулҳ фонида янгради. Аввалроқ, Трамп АҚШ Эрон томонидан тақдим этилган 10 банддан иборат таклифни олганини билдирган эди. Унга кўра, бу режа музокаралар учун “реал асос” бўлиб хизмат қилиши мумкин.

CNN телеканали хабарига кўра, Исроил ҳам икки ҳафталик сулҳга амал қилади.
Эрон томони даъво қилаётган мажбуриятлар:

Эрон Хавфсизлик кенгашига кўра, АҚШ қуйидаги шартларни қабул қилган:

• Агрессиядан воз кечиш – АҚШ Эрон ҳудудига ҳужум қилмаслик мажбуриятини олади;
• Ҳормуз бўғози устидан назорат – Ҳормуз устидан назорат Эронда қолади;
• Ядро дастурини тан олиш – Эроннинг уран бойитиш ҳуқуқи эътироф этилади;
• Санкцияларни бекор қилиш – барча бирламчи ва иккиламчи чекловлар олиб ташланади;
• Халқаро қарорларни бекор қилиш – халқаро ташкилотларнинг резолюциялари тўхтатилади;
• Компенсация тўлаш – АҚШ Эрон кўрган зарарни қоплайди;
• АҚШ қўшинларини олиб чиқиш – Америка ҳарбийлари Яқин Шарқни тарк этади;
• Урушни тўлиқ тўхтатиш – барча фронтларда жанглар якунланади.

Ким ютди?

Эрон баёноти АҚШ позициясидан кескин фарқ қилади. Трамп сулҳни ўзи ва Яқин Шарқ давлатлари учун “шараф” деб атаган ҳамда АҚШ ҳарбийлари “барча мақсадларга эришганини” таъкидлаган.

Теҳрон эса вазиятни ўзаро келишув эмас, балки Вашингтоннинг тўлиқ таслим бўлиши сифатида талқин қилмоқда.