АҚШ Россияни “тажовузкор” деб аташга қарши чиқди

north_east

Трамп Украинадан юз ўгирдими? АҚШ БМТда Москвани қораламади 

АҚШ Украинада ҳарбий ҳаракатлар бошланганининг 3 йиллиги муносабати билан G7 (Еттилик гуруҳи) баёнотида Россияни “тажовузкор” дея аташга қарши чиқди. Бу ҳақда ўз манбаларига таяниб, “Financial Times” хабар берди.

“Америкаликлар бу иборани тўсиб қўймоқда, аммо биз ҳали ҳам бу борада ишлаяпмиз ва келишувга эришишга умид қиламиз”, деган манба нашрга.

Унинг ёзишича, Украина Президенти Владимир Зеленскийнинг G7 саммитидаги иштироки ҳали тасдиқланмаган. Тадбир 24 февраль куни онлайн шаклда ўтказилади. Маълум қилинишича, АҚШ Президенти Дональд Трамп маъмурияти жангларни “Украина можароси”, деб аташни бошлаган.

Маълумот учун, G7 давлатларининг ўтган йилги қўшма коммюникесида Россиянинг ҳаракатларига нисбатан “тажовузкор” сўзи беш марта ишлатилган.

Эслатиб ўтамиз, 18 февраль куни Дональд Трамп Флориданинг Мар-а-Лаго шаҳрида бўлиб ўтган матбуот анжуманида Украинада сайловлар узоқ вақтдан бери ўтказилмагани ва халқ Президент Зеленскийдан унчалик мамнун эмаслигини, унинг ишончи 4 фоизгача тушиб кетганини айтганди.

Бунга жавобан Украина Президенти Владимир Зеленский эса кеча, 19 февраль куни бўлиб ўтган матбуот анжуманида Трампга жавоб қайтариб, унинг ишонч рейтинги 57 фоизни ташкил этишини, Трамп Зеленскийнинг ишонч рейтинги 4 фоизга баҳолангани ҳақидаги сўзларини Россиядан келган маълумотларга асосланганини, ҳозирда ҳеч ким уни алмаштира олмаслигини айтди.

Орадан кўп ўтмай Трамп яна бир баёнот билан чиқиб, Зеленскийни “сайловларсиз диктатор” ва “муваффақиятли комедиячи” деб атади. Шунингдек, Трамп Зеленский сайловларда қатнашишдан бош тортганини, Байденни “скрипка каби” чалишни  яхши билганини ёзди.