АҚШ Россияга қарши янги санкциялар тайёрламоқда – Марко Рубио

АҚШ Россияга қарши янги санкциялар пакетини тайёрламоқда. Бу ҳақда АҚШ Давлат котиби Марко Рубио маълум қилди.

Марко Рубио АҚШ Конгресси Вакиллар палатасининг ташқи ишлар қўмитасида ўтказилган эшитувлар чоғида Сенат томонидан тайёрланаётган санкциялар тўғрисидаги қонун лойиҳаси устида иш олиб борилаётганини айтган.

“Санкциялар тўғрисидаги қонун лойиҳасига келсак, биз сизлар билан, сенатор Линдси Грем ва эҳтимол бошқа ҳуқуқий маслаҳатчилар билан ҳамкорлик қилдик. Сиз айрим формулировкаларни муҳокама қилдингиз, шунинг учун менимча, сиз ўз қонун лойиҳангизда керакли натижага эришасиз”, деган Рубио.

Унинг қўшимча қилишича, АҚШ Президенти Дональд Трамп бу ташаббусни маъқуллаган. Ҳозирда эса қонун лойиҳасидаги матн ва атамалар якуний келишув босқичида.

Аввалроқ, Марко Рубио АҚШ вазият имконият бериши билан Россиядан нефть етказиб бериш бўйича лицензияларни узайтиришни тўхтатишини айтган эди. У буни шароитга боғлиқ эканини таъкидлаб, бундай рухсатномалар вақтинчалик чоралар эканини ва жаҳон нефть бозорига кенгроқ киришни таъминлаш мақсадида жорий этилганини билдирган.

Шу билан бирга, АҚШ илгари санкция рўйхатидан иккита нефть танкерини ва 11 нафар Россия фуқаросини чиқариб ташлаган эди.

Жорий йилнинг 18 май куни АҚШ Россия нефтини денгиз орқали ташишга нисбатан жорий этилган айрим санкцион истисноларни яна узайтирган. Reuters агентлиги хабар беришича, бу қарор бир қатор давлатлар Россия нефтини харид қилиш учун қўшимча вақт сўрагани билан изоҳланган. Бунга Яқин Шарқдаги можаро сабабли Форс кўрфазидан нефть етказиб беришдаги узилишлар ва Ҳормуз бўғозининг ёпилиши билан боғлиқ муаммолар ҳам таъсир қилган.

Шу ой ичида АҚШ Молия вазирлиги “ЛУКОЙЛ” компаниясининг хориждаги активларини сотиш учун берилган лицензияни бир ойга узайтирган. Компания ушбу активларни ўтган йил октябрь ойида АҚШ санкциялари сабаб сотишга қарор қилган эди.

Апрель ойининг охирида АҚШ Молия вазирлиги Россияга босим ўтказишнинг янги усулларини излаётгани ҳақида маълум қилган. Трамп эса Россияга янги санкциялар киритмаслик сабабини изоҳлаб, 2025 йилда Украина бўйича тинчлик келишуви тузилишини кутяпман, деб айтган.

Эслатиб ўтамиз, аввалроқ Украина Президенти Владимир Зеленский урушни имкон қадар тезроқ якунлаш бўйича топшириқ бергани ҳақида хабар берилганди.