АҚШ Россияга қарши “қора рўйхат”ини кенгайтирди

АҚШ Савдо вазирлиги санкциялар рўйхатини кенгайтириб, унга Россия билан алоқалари учун 32 та хорижий компанияни киритди. Янгиланган рўйхат вазирликнинг расмий сайтида эълон қилинди.

АҚШ Саноат ва хавфсизлик бюроси қарорида Экспорт назорати регламентига тузатишлар киритилиб, 32 та ташкилот қўшилган. Хусусан, Хитой Халқ Республикасининг 23 та, Ҳиндистон, Эрон, Сингапур ва Тайваннинг 1 тадан, Туркиянинг 3 та ва Бирлашган Араб Амирликларининг 2 та компанияси санкцияга тушган.

“АҚШ ҳукумати уларнинг ҳаракатлари Қўшма Штатлар миллий хавфсизлиги ёки ташқи сиёсати манфаатларига зид эканини тан олди”, дейилади ҳужжат матнида.

Рўйхатга киритилган компаниялардан баъзилари:

• Shanghai Fudan Microelectronics Co., Ltd. (Хитой) – Россия ҳарбий саноати учун технологиялар етказиб бергани учун;
• AR Sales Pvt Ltd. (Ҳиндистон) – америка маҳсулотларини Россияга етказиб беришга урингани учун;
• Atempo Proje Taahhüt Ses ve Görüntü Sistemleri Anonim Şirketi İstanbul Şubesi, EB Teknoloji Sistemleri Anonım Şirketi va Dentun Elektronik (Туркия) – шунга ўхшаш уринишлари учун;
• HAS General Trading (БАА) – Россия ва Эронга экспорт назорати остидаги товарларни етказиб бергани учун.

Қайд этиш жоиз, бунгача АҚШ Президенти Доналд Трамп барча НАТО давлатлари розилик билдириб, Россия нефтини сотиб олишни тўхтатгач, Москвага қарши жиддий санкциялар киритишга тайёрлигини айтган. Шунингдек, у НАТО давлатларини Хитойга қарши божлар жорий этишга чақирган.

Эслатиб ўтамиз, аввалроқ Буюк Британия Россия мудофаа секторига оид 27 та компания ва корхонани янги санкциялар рўйхатига киритгани ҳақида хабар берилган эди. “Қора рўйхат”га “Анозит”, “Протон”, “Синвент”, “Элеcонд”, “Поиск”, “Солитон”, “Технодинамика”, “Русполимет”, “Бин Инь”, “Синь ю”, Россия қудратли радиотехника институти, “СССР 50 йиллиги” номидаги Брянск кимё заводи, “Мезон” ва “Реконд” заводлари, Редкинский тажриба заводи, “Звукотехника” корхонаси, Сарапул заводи, Митиши асбобсозлик заводи, шунингдек, “Икар” конструкторлик бюроси киритилган.