АҚШ разведкаси келаси ҳафталарда Трампга яна суиқасд уюштирилишини истисно қилмайди – “Politico”

Яқин ҳафталарда АҚШнинг собиқ президенти Дональд Трампга қарши янги суиқасд уюштирилиши мумкин. Бу ҳақда америкалик юқори мартабали амалдорларга таяниб, “Politico” хабар берди.

Нашрнинг таъкидлашича, АҚШ маъмурияти турли манбалардан Теҳрондан Трампга нисбатан таҳдидлар ҳақида маълумот олган. Газетанинг ёзишича, Эрон кўп йиллар давомида 2020 йилда эронлик генерал Қосим Сулаймонийнинг ўлдирилиши учун “Трампдан қасос олишга” интилади.

Шу билан бирга, икки америкалик расмийнинг сўзларига кўра, АҚШ расмийларида 13 июл куни Пенсильванияда бўлиб ўтган митинг чоғида Трампга уюштирилган суиқасд тўғридан-тўғри ёки билвосита Эрон билан боғлиқлиги ҳақида ҳеч қандай далил йўқ.

Нашрнинг ёзишича, АҚШ разведкаси Эрон имкониятларидан хавотирда, чунки улар гўёки “АҚШ фуқароларига қарши кенг кўламли ҳужумлар уюштиришга” рухсат беришмоқда.

Эслатиб ўтамиз, кеча, 16 июль куни CNN телеканали Америка расмийлари Эрон Трампга суиқасд уюштиришни режалаштираётгани ҳақида Пенсильваниядаги митингдан бир неча ҳафта олдин маълумот олганини хабар қилганди. Кейинроқ Эроннинг БМТдаги доимий ваколатхонаси Теҳронга қарши Трампга суиқасд уюштиришга алоқадорлик айбловларини рад этди.

Миссиянинг таъкидлашича, Эрон бу айбловларни асоссиз ва холис деб билади, гарчи у Трампни Сулаймонийни ўлдиришга буйруқ бергани учун судланиши ва жазоланиши керак бўлган жиноятчи деб билса ҳам.