АҚШ Польшадаги қўшинларини кўпайтириши мумкин

АҚШ ўз қўшинларини Польшадан олиб чиқиб кетиш ниятида эмас. Бу ҳақда АҚШ Президенти Дональд Трамп кеча, 3 сентябрь куни Вашингтонда ўзининг янги сайланган польшалик мавқедоши Кароль Навроцкийни қабул қилиш вақти айтиб ўтди.

Трампнинг қўшимча қилишича, америкаликларнинг Польшадаги ҳарбий иштироки “агар поляклар буни хоҳласалар”, ҳатто кўпайтирилиши мумкин.

“Биз Польшадан қўшинларни олиб чиқиш имкониятини ҳеч қачон кўриб чиқмаганмиз. Биз буни бошқа мамлакатларга нисбатан кўриб чиқамиз, лекин биз Польшани тўлиқ қўллаб-қувватлаймиз ва унга ўзини ҳимоя қилишга ёрдам берамиз”, деди Трамп.

У, шунингдек, Вашингтон ва Варшава ўртасидаги муносабатлар ҳар доим мустаҳкам бўлганини, аммо ҳозир улар "ҳар қачонгидан ҳам яхшироқ” эканини айтди.

Кароль Навроцкий учрашув натижаларини қуйидагича изоҳлади:

“Трамп Польшага хавфсизлик кафолатларини берди ва ҳарбий соҳадаги иттифоқчилар сифатида ҳамкорлигимизни таъкидлади, бу катта муваффақият”.

Польша Президенти америкалик мавқедоши билан Американинг Польшадаги ҳарбий иштирокини ошириш бўйича аниқ таклифларни муҳокама қилганини айтди. Навроцкий, шунингдек, Трампни Варшавага ташриф буюришга таклиф қилди.

Ҳозирда Польшада 10 мингга яқин америкалик аскар жойлашган. Жорий йил 22 февраль куни ўша пайтдаги президент Анжей Дуда Трамп билан АҚШда бўлиб ўтган музокарадан сўнг АҚШ қўшинлари Польшадан олиб чиқилмаслигини ва уларнинг сонини ҳатто ошириш мумкинлигини айтди.

“Биз алоқалар мустаҳкамланишини кутишимиз керак, чунки биз НАТОнинг ишончли иттифоқчисимиз. Польша хавфсизлиги – бу АҚШ сармоя киритаётган асосий масала”, деди Дуда.

7 апрель куни АҚШ ўз қўшинларини Ғарбнинг Украинага ҳарбий ёрдам кўрсатиш маркази бўлган Рзешов яқинидаги Польша ҳарбий аэродромидан олиб чиқилишини эълон қилди. Ҳарбий хизматчилар ва техника у ердан Польшанинг бошқа жойларига кўчирилиши, бироқ аэродромдан Украинага ҳарбий ёрдам кўрсатишда давом этиши хабар қилинганди.