АҚШ компаниялари Украинага қурол таъминотини тўхтатмоқда

АҚШнинг айрим компаниялари Трамп билан кескинлик фонида Украинага қурол етказиб беришни тўхтатди. Бу ҳақда Украина Олий радасининг Миллий мудофаа ва разведка қўмитаси раиси Роман Костенко маълум қилди.

“Менда мавжуд маълумотларга кўра, сотув учун мўлжалланган қурол етказиб берилиши тўхтатилган. Ушбу қуролларни Украинага етказиб бериши керак бўлган компаниялар ҳозир кутиб турибди, чунки ҳали қарор қабул қилингани йўқ”, дейди депутат.

Унинг сўзларига кўра, АҚШ ҳукумати томонидан кўрсатилаётган “моддий-техник” ёрдам ҳануз давом этмоқда, аммо Украинага қурол етказиб берадиган айрим етказиб берувчилар турли сиёсий қарорларни кутмоқда.

“Барча қарорни кутмоқда: ҳеч бўлмаганда пул эвазига бу ерга қурол етказиб бериш ва Украина билан ишлаш туфайли ҳеч қандай муаммога дуч келмаслик масаласи ҳал бўладими ёки йўқми?”, дейди Костенко.

У бу фикрида АҚШ ва Украина расмийлари ўртасида сўнгги кунларда давом этаётган музокаралар ҳамда Украина Президенти Владимир Зеленский ва АҚШ Президенти Дональд Трамп ўртасидаги тарангликни назарда тутган.

Маълумот учун, жорий йил бошида Трамп маъмуриятида АҚШ захираларидан Украинага қандай ҳажмда ҳарбий ёрдам кўрсатиш масаласида келишмовчиликлар юзага келган. “Reuters” нашрининг ёзишича, шунга қарамай, февраль ойининг дастлабки кунларида АҚШ Президенти инаугурациядан кейинги қисқа паузадан сўнг иттифоқчига қурол етказиб беришни қайта тиклаган. Нашр манбаларига кўра, Оқ уй Украинага ҳар қандай ёрдамни бутунлай тўхтатиш ғоясидан воз кечган.

АҚШ Давлат департаменти маълумотларига кўра, Россиянинг ҳарбий босқини бошланганидан 2025 йилгача бўлган даврда АҚШ Киевга 66 миллиард доллар ҳарбий ёрдам ажратган, 2014 йилдан бошлаб эса бу кўрсаткич тахминан 70 миллиард долларни ташкил этади. Зеленский Украинага етказиб берилган қуролнинг умумий қийматини 76 миллиард доллар атрофида баҳолаган. Трамп эса Украинага етказиб берилган қуролларнинг қиймати 200 миллиард доллар, ҳаттоки 350 миллиард доллар бўлиши мумкинлигини таъкидлаган.

Эслатиб ўтамиз, кеча, 19 февраль куни Трамп ушбу тармоқдаги ўз аккаунтида Зеленский ҳақида кескин фикр билдириб, уни диктатор деб атаганди. У, шунингдек, Украина Президентининг рейтинги пастлигини таъкидлаган. Трампнинг фикрича, Зеленскийнинг ягона истеъдоди “скрипка чалгандек” собиқ АҚШ президенти Жо Байденни ҳарбий мақсадлар учун 350 миллиард доллар ажратишга кўндириш бўлган.

Трамп шунингдек, Украина Президенти Россия билан қарама-қаршиликда устунлик қозона олмаслигига ишонч билдирган. Оқ уй раҳбари Зеленский илгари комедия жанридаги актёр сифатида “камтарона муваффақият”га эришганини эслатган, бироқ, шунга қарамай, унинг АҚШдан катта миқдорда ҳарбий ёрдам олишга муваффақ бўлганини таъкидлаган.

Бунга жавобан Германия канцлери Олаф Шольц Дональд Трампнинг Владимир Зеленскийни диктатор деган даъвосини кескин рад этди. Германия канцлерига кўра, Зеленский Украинанинг қонуний давлат раҳбари саналади. Шунингдек, Шольц Украинага қарши урушни айнан Владимир Путин бошчилигидаги Россия бошлаганини эслатиб ўтган.