“Зеленский диктатор эмас”. Германия Трампнинг иддаосини танқид қилди

north_east

Трамп Зеленскийни “сайловсиз диктатор” деб атади

Германия канцлери Олаф Шольц АҚШ Президенти Дональд Трампнинг Украина етакчиси Владимир Зеленскийни диктатор деган даъвосини кескин рад этди. Бу ҳақда у кеча, 19 февраль куни “Der Spiegel ” нашрига берган интервьюсида сўз очди. 

Германия канцлерига кўра, Зеленский Украинанинг қонуний давлат раҳбари саналади.

“Ҳақиқат шуки, Владимир Зеленский Украина давлатининг қонуний сайланган раҳбари ҳисобланади. Уруш шароитида ҳаққоний сайловларни ўтказишнинг иложи йўқлиги Украина конституцияси ва сайлов қонунлари қоидаларига тўғри келади. Ва бунинг аксини даъво қилишга ҳеч кимнинг ҳаққи йўқ”, дея таъкидлаган Германия ҳукумати раҳбари. 

Шунингдек, у Украинага қарши урушни айнан Владимир Путин бошчилигидаги Россия бошлаганини эслатиб ўтган.

“Украина қарийб уч йилдан бери Россиянинг шафқатсиз тажовузидан ўзини ҳимоя қилмоқда. Ҳар куни”, дея таъкидлаган Шольц.

Шу билан бирга, Трампнинг Зеленский ҳақидаги баёнотлари Германия Ташқи ишлар вазири Анналена Бербок ва Иқтисодиёт вазирлиги раҳбари, вице-канцлер Роберт Хабек томонидан ҳам танқид қилинган.

“Агар сиз ижтимоий тармоқларда шошқалоқ постлар ёзмасангиз, реал дунёга диққат билан қарасангиз, балки Европада ким диктатура остида яшашга мажбур бўлганини кўрган бўлардингиз. Булар – Россиядаги одамлар, Беларусдаги одамлар”, деган Бербок.

Унинг қўшимча қилишича, Украина аҳолиси эркин демократия учун ҳар куни кураш олиб боради.

“Украиналиклар ҳар куни ўзларининг эркин демократияси учун курашади ва биз, европаликлар, демократик давлатларимизни биргаликда мустаҳкамлаш учун уларни Европа Иттифоқига борадиган йўлда қўллаб-қувватлаймиз”, деган Германия ТИВ раҳбари.

Роберт Хабек ҳам ўз ижтимоий тармоғида Россиянинг Украинага ҳужум қилганини ёзиб қолдирган.

“АҚШ Президентининг баёноти ҳайратга солади. Бу воқеликни мисли кўрилмаган бузиб кўрсатиш ва ўта хавфли риторика. Ҳақиқат шуки, диктатор Путин демократик Украинага ҳужум қилди”, дея ёзган у.

Эслатиб ўтамиз, аввалроқ Германия канцлери Олаф Шольц АҚШ Президенти Дональд Трампнинг Украинанинг молиявий ёрдам эвазига АҚШга ноёб тупроқ металларини етказиб бериши ҳақидаги талабини танқид қилганди. Шольц келажакда Украинага кучли армия, шунингдек, мамлакатни қайта тиклаш учун маблағ керак бўлишини таъкидлаганди.