Шольц Трампни худбинликда айблади

Германия канцлери Олаф Шольц АҚШ Президенти Дональд Трампнинг Украинанинг молиявий ёрдам эвазига АҚШга ноёб тупроқ металларини етказиб бериши ҳақидаги талабини танқид қилди. Бу ҳақда у кеча, 3 февраль куни кечқурун Брюсселда бўлиб ўтган Европа Иттифоқининг норасмий мудофаа саммитидан сўнг гапирди.

“Урушдан кейин зарур бўладиган ҳамма нарсани молиялаштириш учун биз ушбу мамлакат ресурсларидан фойдаланишимиз керак”, деган Шольц.

Унинг сўзларига кўра, ҳозир пулни мудофаани қўллаб-қувватлаш учун ишлатиш “ўта кетган худбинлик” бўлади.

Шольц келажакда Украинага кучли армия, шунингдек, мамлакатни қайта тиклаш учун маблағ керак бўлишини таъкидлади.

“Украинада рўй бераётган улкан вайронагарчиликни ҳисобга олсак, булар катта вазифалардир. Шунинг учун ҳам Украина ресурсларидан яхши келажак учун фойдаланилса яхши бўларди, деб ўйлайман”, дейди Германия канцлери.

Аввалроқ Трамп Украина АҚШга ноёб тупроқ металларини етказиб беришга ваъда берса, унга ёрдам кўрсатишда давом этишини айтган эди.

Оқ уй раҳбари Киевдан Вашингтонга ресурслар етказиб беришни хоҳлайдими, деган саволга АҚШ Президенти ижобий жавоб бериб, нодир ер металларини етказиб бериш бўйича “кафолатга эга бўлишни” истаётганини таъкидлади ва Украина бунга аллақачон тайёр эканини кўрсатди. Трампнинг сўзларига кўра, у Вашингтондан кўрсатилган ёрдам учун Киевнинг “деярли 300 миллиард доллар товон тўлашини” истайди.

Ғарб давлатларининг Украинанинг ноёб тупроқ металларига кириши Владимир Зеленскийнинг “ғалаба режаси”нинг нуқталаридан биридир. У Киевни қўллаб-қувватловчи давлатлар учун “сармоя даромадини таъминлашга” ваъда берди ва Украинанинг табиий ресурслари, жумладан, “триллионлаб долларлик муҳим металлар” ҳақида гапирди. Улар орасида уран, титан, литий, графит бор. Зеленский ушбу режани Трампга 2024 йилнинг сентябрида Нью-Йоркдаги учрашувда тақдим этган эди.

Эслатиб ўтамиз, жорий йилнинг 2 февраль куни Германия канцлери Олаф Шольц Лондон яқинидаги Чекерс расмий қароргоҳида Буюк Британия Бош вазири Кир Стармер билан учрашди. Шольц ва Стармер Украинани қўллаб-қувватлашни давом эттиришга ваъда берди.