АҚШ КХДРга қарши санкция киритди

АҚШ КХДР билан боғлиқ саккиз нафар жисмоний шахс ва икки ташкилотга қарши санкциялар киритди. Бу ҳақда кеча, 4 ноябрь куни Америка Қўшма Штатлари Молия вазирлиги расмий сайтида хабар берилди.

“Бугун Молия вазирлиги Хорижий активларни назорат қилиш бошқармаси турли ноқонуний схемалар орқали олинган КХДР даромадларини ювишда иштирок этган саккиз жисмоний ва икки юридик шахсга қарши санкциялар киритди”, дейилади хабарда. 

Вазирликка кўра, санкцияларга тушган шахслар ва компаниялар кибержиноятлар ва фирибгарлик билан шуғулланган ва “КХДР ядровий дастурини молиялаштиришга ёрдам берган”.

“КХДР қуролларини ишлаб чиқиш билан шуғулланувчи тузилмалар АҚШ ва бутун дунё хавфсизлиги учун бевосита таҳдид ҳисобланади. Молия вазирлиги бундай шахслар ва ташкилотларнинг фаолиятини тўхтатишга интилади”, деган АҚШ Молия вазири ўринбосари Жон Ҳерли. 

Олдинроқ ҳам АҚШ Россия, КХДР ва Хитойдан икки шахс ва икки компанияга санкциялар киритган эди. Улар киберфирибгарликда иштирок этганликда айбланган. Рўйхатга Россиялик Виталий Андреев, КХДР фуқароси Ким Ун Сун, шунингдек, Korea Sinjin Trading Corporation ва Shenyang Geumpungri Network Technology компаниялари киритилган.

Эслатиб ўтамиз, мамлакатга нисбатан санкциялар ёғдирилаётган бир пайтда Шимолий Корея эмин-эркин ўзининг янги қуролларини синовдан ўтказиб, дунё лидерларига кўз-кўз қилмоқда. Масалан, 28 октябрь куни Шимолий Корея сувларида денгиздан қуруқликка стратегик қанотли ракеталарни синовдан ўтказиш амалга оширилганди.