АҚШ Исроилга қўшин жўнатмоқчи эмас – Оқ уй

Америка Қўшма Штатлари Исроил ва Фаластин ўртасидаги тўқнашувларда иштирок этиш учун қўшин юбориш ниятида эмас. Бу ҳақда Оқ уй Миллий хавфсизлик кенгашининг стратегик алоқалар бўйича координатори Жон Кирби маълум қилди.

“Биз ҳозирча Исроилда қўшин жойлаштиришни режалаштирмаяпмиз. Бироқ, Қўшма Штатлар доимо ўз манфаатларидан келиб чиқади. Биз ҳар доим миллий манфаатларимизни ҳимоя қилиш ва бутун дунё бўйлаб, шу жумладан, ушбу минтақада хавфсизлик бўйича мажбуриятларимизни бажариш учун зарур бўлган ишни қиламиз”, дейди Кирби.

Унга кўра, Қўшма Штатлар Исроилга ҳарбий ёрдам етказиб беришни бошлаган ва яқин кунларда қўшимча маблағ ажратилишини эълон қилади.

"Биз яқин кунларда Исроил душманларининг мавжуд вазиятдан фойдаланишга уринишининг олдини олиш учун кўпроқ ёрдамни эълон қиламиз", деган у.

ҲАМАСнинг сўнгги ҳаракатларига Эроннинг алоқадорлиги ҳақидаги саволга жавоб берар экан у Теҳрон бир неча йиллардан бери ҲАМАСни қўллаб-қувватлаб келаётгани учун содир бўлаётган воқеаларга “маълум даражада шерик” эканини айтган.

Маълумот учун, жорий йилнинг 7 октябрь куни эрталаб Ғазо секторидан Исроил ҳудудига ракета ҳужуми бошланган. Кейинчалик ҲАМАС ҳаракати Исроилга қарши “Ал-Ақсо тўфони” ҳарбий операцияси бошлаганини эълон қилди. Исроил Мудофаа кучлари эса бунга жавобан “Темир қиличлар” “аксилтеррор операцияси”ни бошлади. Бу орада Америка Қўшма Штатлари Ғазо сектори атрофидаги кескинлик фонида “Эронни жиловлаш учун” Яқин Шарққа қўшимча 20-25 та F-35 ва F-15 қирувчи самолётларини юбориши маълум бўлди. Германия эса Фаластин ҳудудларидаги гуманитар лойиҳалар учун аввал тасдиқланган маблағларни ажратишни тўхтатди.

Эслатиб ўтамиз, олдинроқ АҚШ Қуролли кучлари штаб бошлиқлари бирлашган қўмитаси раиси Чарльз Браун Эронни Исроилдаги можарога аралашиши оқибатларидан огоҳлантирганди. NBC телеканали эса Америка маъмурияти Украина учун қўшимча молиялаштириш ва Исроилга ёрдам сўровларини бирлаштириш имкониятини кўриб чиқаётганини хабар қилди.