АҚШ Эронга кетма-кет учинчи тунги ҳужумларини уюштирди (видео)

АҚШ ҳарбийлари Президент Дональд Трамп топшириғи билан бошланган Эронга қарши кетма-кет учинчи тунги ҳужум зарбалар якунланганини билдирди. Бу ҳақда АҚШ Марказий қўмондонлиги (CENTCOM) Х ижтимоий тармоғида баёнот берди.

Қайд этилишича, беш соат давом этган амалиёт чоғида Бушеҳр, Чаҳбаҳор, Жаск, Конарак, Абу Мусо ва Бандар Аббосдаги ҳарбий нишонлар муваффақиятли нишонга олинганини маълум қилган. Бу Президент Дональд Трамп Эрон кемаларига нисбатан блокадани қайта жорий этишини ва Ҳормуз бўғозини қўриқлаш учун 20 фоизлик тўлов жорий этишни таклиф қилгани ортидан Эронга қарши кетма-кет учинчи тунги ҳужум бўлди.

Эрон Қуролли кучлари ягона қўмондонлиги АҚШ Ҳормуз бўғозининг келажагини белгилашда ҳеч қандай роль ўйнамаслиги ва бу жараёнга аралашишига йўл қўйилмаслигини билдирган. Эрон ҳафта охирида стратегик аҳамиятга эга Ҳормуз бўғозини ёпаётганини эълон қилган эди.

Маълумот учун, Эрон уруши 28 февраль куни АҚШ ва Исроилнинг Эронга ҳужумлари билан бошланган. Шундан сўнг Эрон Исроил ҳамда АҚШ ҳарбий базалари жойлашган Форс кўрфази давлатларига зарбалар берган.

Уруш давомида АҚШ ва Исроилнинг Эронга, шунингдек Исроилнинг Ливанга қилган ҳужумлари минглаб одамлар ҳалок бўлишига ва миллионлаб инсонлар ўз уйини тарк этишига сабаб бўлди. Можаро жаҳон нефть нархларининг кескин ўсишига ва халқаро молия бозорларида беқарорлик кучайишига ҳам олиб келди.

Эслатиб ўтамиз, аввалроқ АҚШ ҳарбийлари Ҳормуз бўғозидаги кескинлик кучайиши ортидан Эронга қарши янги ҳужумлар бошлаган эди. Президент Дональд Трамп ушбу ҳужумларга Эрон кучларини жавобгарликка тортиш мақсадида шахсан кўрсатма берганди.