АҚШ бир вақтнинг ўзида Украина ва Исроилни қўллаб-қувватлаши мумкин – Оқ уй

Қўшма Штатлар бир вақтнинг ўзида Украинанинг Россияга қарши курашини ва Исроилнинг ўзини ўзи ҳимоя қилиш саъй-ҳаракатларини қўллаб-қувватлаш учун етарли ресурсларга эга. Бу ҳақда АҚШ миллий хавфсизлик бўйича маслаҳатчиси Жейк Салливан маълум қилди.

"Биз Қўшма Штатлар бир вақтнинг ўзида эркинликни севувчи Украина халқини ва Исроил давлатини қўллаб-қувватлай олмайди, деган фикрни қатъиян рад этамиз", дейди у.

Салливаннинг қайд этишича, Вашингтонда ҳар икки давлатга ёрдам бера оладиган бюджет бор.

Шунингдек, у Россиянинг Европа қитъасида урушда ғалаба қозонишига йўл қўймаслик учун ҳозирда Киевни қўллаб-қувватлаш, агар Россия Федерацияси Украинани босиб олиб, бутун Европа бўйлаб агрессияни давом эттирса, келажакда потенциалдан кўра АҚШ учун фойдалироқ эканини даъво қилган.

“Кейинчалик катта тўловни тўлашдан кўра ҳозир чора кўриш анча самаралироқ. Бу охир-оқибат, ўтмишда бўлганидек, жанговар операцияларга АҚШ қўшинларининг амалда киритилишини талаб қилиши мумкин”, дейди Салливан.

Эслатиб ўтамиз, аввалроқ Америка Қўшма Штатлари Исроил ва Фаластин ўртасидаги тўқнашувларда иштирок этиш учун қўшин юбориш ниятида эмаслигини билдирганди.

Исроил-Фаластин можароси

Жорий йилнинг 7 октябрь куни эрталаб Ғазо секторидан Исроил ҳудудига ракета ҳужуми бошланди. Кейинчалик ҲАМАС Исроилга қарши “Ал-Ақсо тўфони” ҳарбий операцияси бошланганини эълон қилди. Исроил Мудофаа кучлари эса бунга жавобан “Темир қиличлар” “аксилтеррор операцияси”ни бошлади.

Шундан сўнг, Бош вазир Биньямин Нетаньяху исроилликларга мурожаат билан чиқиб, мамлакатда содир бўлаётган воқеалар ҳарбий операция эмас, балки тўлақонли уруш эканини айтди.  9 октябрь куни Исроил Мудофаа вазири Йоав Галант Исроил ҳарбийлари Ғазо секторини кенг кўламли блокадага киришаётганини маълум қилди. У Ғазо секторида электр, озиқ-овқат, ёқилғи бўлмаслигини, ҳамма нарса ёпилишини айтди. 

Шунингдек, Исроил Ғазо секторидаги Ал-Ярмук, Ал-Эмин Муҳаммад, Аҳмад Ясин, Муҳаммад Эл-Ҳабиб, Эс-Суси ва Ал-Ғарби масжидларига зарба берди.  Бу орада Америка Қўшма Штатлари Ғазо сектори атрофидаги кескинлик фонида “Эронни жиловлаш учун” Яқин Шарққа қўшимча 20-25 та F-35 ва F-15 қирувчи самолётларини юбориши маълум бўлди. Германия эса Фаластин ҳудудларидаги гуманитар лойиҳалар учун аввал тасдиқланган маблағларни ажратишни тўхтатди.

Венесуэла Президенти Николас Мадуро эса Исроилни Фаластин халқини қирғин қилишда айблаб, зудлик билан тинчлик музокараларини бошлаш ва Фаластиннинг ҳудудий ҳуқуқларини кафолатловчи БМТ резолюцияларини амалга оширишга чақирди. Россия Президенти Владимир Путин ҳам мустақил суверен Фаластин давлатини яратиш зарурлигини айтиб ўтди. Шунингдек, у Исроил ва ҲАМАС ўртасидаги қуролли тўқнашувларни АҚШ сиёсати муваффақиятсизлигининг яққол мисоли деб атади. Украина Президенти Владимир Зеленский эса Яқин Шарқдаги бу можародан Россия манфаатдорлигини таъкидлади.