АҚШ айрим ўзбекистонликларга виза беришни чеклади

АҚШ Давлат департаменти Ўзбекистонда АҚШга ноқонуний иммиграцияни била туриб ташкиллаштиришда иштирок этган шахсларга нисбатан виза чекловларини қўллаш чораларини кўрди. Бу ҳақда департаментнинг расмий сайтида хабар берилди.

Бу чоралар Ўзбекистонда жойлашган иккита виза хизматлари компаниясининг раҳбарлари ва юқори лавозимдаги масъул ходимларига тааллуқли бўлиб, улар АҚШга ноқонуний кўчиб ўтишни режалаштирган шахслар учун асосан шу мақсадга қаратилган саёҳат хизматларини кўрсатгани аниқланган.

Мазкур қарор Иммиграция ва фуқаролик тўғрисидаги қонуннинг 212(а)(3)(С)-бўлимига мувофиқ қабул қилинган. Ушбу меъёрга кўра, АҚШ ташқи сиёсатига жиддий салбий оқибатлар келтириб чиқариши мумкин бўлган шахсларнинг мамлакатга кириши тақиқланиши мумкин.

Тергов маълумотларига кўра, Ўзбекистондаги айрим шахслар, жумладан вояга етмаганларни ҳам ўз ичига олган ҳолда, АҚШга ноқонуний иммиграция қилишни кўзлаган одамлар учун транспорт ҳаракатларини мувофиқлаштирган. Улар Марказий Америкадаги транзит нуқталаригача аэропортлар ва чегаралар орқали ташишни ташкил этган, кейинчалик кўпчилиги АҚШга ноқонуний киришга уриниш пайтида аниқланган.

АҚШ миллий хавфсизлик ёки иммиграция қонунларини издан чиқаришга қаратилган ҳар қандай уринишларга тоқат қилмаслигини билдирган. Давлат департаменти ноқонуний иммиграциядан фойда кўраётган шахслар жавобгарликка тортилишини таъминлашини ва чегаралар ҳамда миллий хавфсизликни ҳимоя қилиш мақсадида одам савдоси ва контрабанда тармоқларига қарши қатъий чоралар кўришини таъкидлаган.

Шу билан бирга, АҚШ ҳукумати ноқонуний иммиграцияни ташкил этувчи жиноий тармоқларни бартараф этиш борасида Ўзбекистон ҳукумати билан яқин ҳамкорликни юқори баҳолашини билдирган.

Эслатиб ўтамиз, аввалроқ АҚШ Давлат департаменти давлат бюджетига юк бўлиши мумкин бўлган аризачиларга қарши кураш доирасида 75 мамлакат фуқароларига виза олиш учун аризаларни кўриб чиқишни тўхтатаётгани ҳақида хабар берилган эди.