АҚШ 8 августгача Украинада тинчлик ўрнатишга чақирди

АҚШ расмийлари Россия ва Украина 8 августгача тинчлик битимини тузишини истамоқда. Бу ҳақда кеча, 31 июль куни АҚШнинг БМТдаги доимий вакили ўринбосари Жон Келли Москва ташаббуси билан чақирилган БМТ Хавфсизлик кенгашининг Украина бўйича йиғилишида маълум қилди.

“Россия ва Украина ўт очишни тўхтатиш ва мустаҳкам тинчлик ўрнатиш бўйича келишиб олиши керак. Келишувни тузиш вақти келди. Президент Трамп буни 8 августгача амалга ошириш кераклигини аниқ айтди. Қўшма Штатлар тинчликни таъминлаш учун қўшимча чоралар кўришга тайёр”, деди Келли.

Россия Федерациясининг БМТдаги доимий вакили ўринбосари Дмитрий Полянскийнинг айтишича, Москва йиғилишдан Хавфсизлик кенгаши эътиборини Ғарбнинг “Украина инқирозини дипломатик йўл билан ҳал қилиш истиқболларига бевосита ёки билвосита путур етказувчи” ҳаракатларига қаратишни сўраган. 

“Украина инқирози Ғарб давлатларининг Россиянинг хавфсизлик манфаатларини менсимасликка қаратилган кўп йиллик саъй-ҳаракатлари натижасида юзага келган кенг қамровли инқирознинг ҳосиласидир", деди Полянский.

У Москванинг Украина масаласини дипломатик йўл билан ҳал қилишга тайёрлигини маълум қилди ва Ғарб давлатларини “тўхтатиш ўрнига ҳамкорлик қилишга” чақирди.

Хитойнинг БМТдаги доимий вакили ўринбосари Генг Шуанг эса Пекиннинг Москва билан иқтисодий ҳамкорлиги танқидини рад этди. Дипломатнинг сўзларига кўра, “Хитойнинг Россия билан Украинадан кўра кўпроқ савдо алоқалари йўқ”.

“Хитойнинг қонуний ҳуқуқлари ва манфаатларига путур етказмаслик керак. Бундан ташқари, АҚШнинг ўзи ҳам Россия билан иқтисодий ва савдо ҳамкорлигини давом эттирди. Агар Қўшма Штатларнинг ўзи буни қилса, нега улар бошқаларга ҳам шундай қилишларига рухсат бермайди?” деди Генг Шуанг.

Украинанинг БМТдаги муваққат ишлар вакили Христина Гаёвишина Россия Федерацияси томонидан чақирилган йиғилишни “бемаънилик ва маънавий жирканчлик” деб атади. Унинг сўзларига кўра, Москва Иккинчи жаҳон урушидан бери Европадаги энг йирик урушни бошлаб юборган ва ҳозирда “ўзини қурбон сифатида кўрсатишга ҳаракат қилмоқда”. Гаёвишина таъкидлашича, уруш “рус тилида сўзлашувчиларни ҳимоя қилиш” учун эмас, балки “империалистик амбицияларни амалга ошириш” учун олиб борилмоқда.

“Бу Кремлдаги авторитар тузумнинг омон қолиши учун олиб борилаётган уруш”, деди у.

Эслатиб ўтамиз, 29 июль куни АҚШ етакчиси Дональд Трамп Россияга берган 10 кунлик ультиматум муддати 8 августда якунланишини айтганди. У Россия Президенти Владимир Путиндан умидлари оқланмаганини билдириб, унинг таҳдидларига жавоб бермаганидан норозилигини билдирди. Трамп Россиядан энергия ресурслари харид қилаётган мамлакатларга нисбатан ҳам 10 кунлик муддат тугагач, иккиламчи бож тўловлари жорий этишини ваъда қилди.