Агар АҚШ ҳужум қилса, “Толибон” Эронга ёрдам беришга тайёр – Забихуллоҳ Мужоҳид

Афғонистондаги “Толибон” муваққат ҳукумати вакили Забихуллоҳ Мужоҳид агар АҚШ Эронга қарши ҳужум бошласа, Афғонистон аҳолиси Эрон халқига ёрдам беришга тайёрлигини маълум қилди.  Бу ҳақда у жорий йилнинг 15 февраль куни Эрон радиосининг Пуштун хизматига берган интервьюсида сўз очди.

“Толибон” вакили икки давлат ўртасида тўқнашувни хоҳламаслигини билдирган ва имкониятлари доирасида ҳамкорлик ва бирдамлик кўрсатишини таъкидлаган. Шунингдек, Мужоҳид Эроннинг Исроил билан яқинда бўлган низодаги ғaлабасини олқишлаб, Теҳрон 12 кунлик урушда ғалаба қозонганини ва яна устун бўлиши мумкинлигини айтган. Шунингдек, у Эрон “бундай қобилиятга эга, ҳақли ва ўзини ҳимоя қилиш ҳуқуқига эга” эканини ҳам алоҳида қайд этган.

Эслатиб ўтамиз, аввалроқ АҚШ Президенти Дональд Трамп журналистлар билан қилган мулоқотида АҚШ учун Эронда ҳокимият алмашуви воқеалар ривожининг энг яхши варианти бўлишини айтган эди.

Шунингдек, АҚШ ҳарбийлари Дональд Трамп Эронга зарба бериш ҳақида буйруқ чиқарган тақдирда, бир неча ҳафта давом этиши мумкин бўлган кенг кўламли операцияга тайёргарлик кўраётгани хабар қилинган эди. Икки америкалик расмий эҳтимолий ҳарбий миссия аввалги чекланган зарбалардан анча жиддийроқ тус олиши мумкинлигини таъкидлаган.

Эъзоза Олимова