Африка кубоги баҳсли финалидан кейин Сенегалликларга нисбатан жазо чоралари эълон қилинди

Сенегал терма жамоаси бош мураббийси Пап Тиав Марокашга қарши Африка кубоги финал учрашувидаги хатти-ҳаракатлари учун беш ўйинга дисквалификация қилинди ва 100 минг доллар жаримага тортилди. Бу ҳақда Африка футбол конфедерацияси (CAF) расмий саҳифасида маълум қилди.

CAF расмий сайтида маълум қилинишича, мураббий “футбол тамойилларига зид, спортга хос бўлмаган хатти-ҳаракатлар” орқали ўйиннинг обрўсига путур етказган.

Жорий йилнинг 18 январь куни бўлиб ўтган финалда Сенегал турнир мезбони Марокашни 1:0 ҳисобида мағлуб этиб, Африка кубогини иккинчи бор қўлга киритган эди. Қўшимча бўлимларда ҳакамнинг Сенегал дарвозасига пенальти белгилаш қароридан норози бўлган Пап Тиав футболчиларни майдонни тарк этиб, кийиниш хонасига олиб кетган. Вазиятдан сўнг Садио Мане жамоадошларини яна майдонга қайтишга кўндирган.

Шунингдек, Сенегал терма жамоаси футболчилари Илиман Ндиайе ва Исмаил Сарр ҳар бири иккитадан ўйинга дисквалификация қилинди. Бундан ташқари, Сенегал футбол федерацияси (FSF) эса мухлисларнинг хатти-ҳаракатлари учун 300 минг доллар, футболчилар ва жамоа ходимларининг спортга хос бўлмаган ҳаракатлари учун 300 минг доллар, финалдаги бешта сариқ карточка учун 15 минг доллар жаримага тортилди.

Марокаш томони ҳам жазолардан четда қолмади. Ярим ҳимоячи Исмаэль Сайбари уч ўйинга дисквалификация қилиниб, 100 минг доллар жаримага тортилди. Жамоа сардори ва ҳимоячи Ашраф Ҳакими эса икки ўйинга дисквалификация қилинди, улардан бири бир йиллик синов муддати билан белгиланди.

Марокаш қироллик футбол федерацияси (FRMF) эса футболчиларнинг ножўя хатти-ҳаракатлари учун 200 минг доллар, техник ходимлар ва футболчилар интизомсизлиги учун 100 минг доллар, мухлислар томонидан лазер кўрсаткичларидан фойдаланилгани учун 15 минг доллар жаримага тортилди.

Шу билан бирга, CAF Сенегал жамоасининг майдонни тарк этиши юзасидан CAF ва FIFA га шикоят қилган Марокаш томонининг апелляциясини рад этганини ҳам маълум қилди.