Афғонистонда кучли ёмғир ва сув тошқинлари оқибатида 50 киши ҳалок бўлди

Афғонистоннинг марказий қисмида кучли ёмғир ва сув тошқини оқибатида камида 50 киши ҳалок бўлди. Бу ҳақда бугун, 18 май куни Ғор вилояти ахборот бўлими раҳбари Мавлавий Абдулҳай Заимга таяниб, “Reuters” нашри хабар берди.

Қайд этилишича, кузатилган кучли ёмғир ва сув тошқинлари оқибатида вилоят маркази Фероз-Коҳда 2000 та уй бутунлай вайрон бўлган, 4000 таси қисман шикастланган, 2000 дан ортиқ дўкон сув остида қолган. Шунингдек, “Толибон” ҳарбий-ҳаво кучлари вертолёти ҳалокатга учраган.

Маълумот учун, Афғонистон табиий офатларга мойил ва Бирлашган Миллатлар Ташкилоти уни иқлим ўзгаришига қарши курашишда энг заиф давлатлардан бири деб билади. 2021 йилда хорижий кучлар мамлакатни тарк этгани сабабли “Толибон” ҳокимиятни эгаллаб олганидан кейин у ёрдам танқислиги билан курашди, чунки ҳукумат молиясининг асосини ташкил этувчи ривожланиш ёрдами қисқартирилди.

Хорижий ҳукуматлар глобал инқирозлар билан курашаётгани ва “Толибон”нинг афғон аёлларига нисбатан чекловини қоралаш кучайиб бораётгани сабабли, танқислик кейинги йилларда ёмонлашди.

Эслатиб ўтамиз, ўтган ҳафтада Афғонистоннинг Бағлон вилоятида содир бўлган сув тошқини 300 дан ортиқ одамнинг ҳаётига зомин бўлганди.