Афғонистонда ҳалокатга учраган самолётдан миллион доллар ўғирлангани ростми?

Аввалроқ, Ҳиндистондан Россияга учаётган самолёт Афғонистонда ҳалокатга учрагани хабар қилинганди. Бадахшон вилоятида қулаган Falcon 10 самолётидан 1,2 миллион доллар пул ўғирлаб кетилгани айтилди. Бу ҳақда “Hasht e Subh” нашри хабар берди.

Портал маълумотларига кўра, ҳалокатга учраган самолётга биринчи бўлиб “Толибон” қуролли кучлари штаби бошлиғи Қори Фасиҳуддин Фитратга алоқадор бўлган бир гуруҳ одамлар етиб борган. Воқеадан хабар топган Бадахшондаги “Толибон” губернатори Муҳаммад Аюб Холид уни текшириш учун комиссия тайинлаган.

Falcon 10 бизнес-жети экипажнинг тўрт аъзоси қутқарилди, бироқ икки йўловчи – тадбиркорлар Анатолий ва Анна Евсюковлар омон қолмади.

Бугун, 26 январь куни эрталаб самолёт бортида бўлган тўрт нафар Россия фуқароси – омон қолган учувчилар ва икки шифокор ватанига қайтди. 

Аэропорт терминалида учувчи Аркадий Грачев ва фельдшер Игорь Сивороткин ҳалокатдан кейинги дастлабки 24 соат ичида қандай омон қолгани ҳақида гапириб берди. 

“Биз совуқда 1,5 кун ўтказдик, шу даражага етдики, биз дантелларни ёқишимиз, ўзимизни иситишимиз керак эди. Кейин шифокорлар бизни ташқарига чиқара бошлади. Шундан сўнг, албатта, афғон дўстларимиз ёрдамга келишди. Бизни тўрт минг метр баландликдан чуқур қор орқали олиб чиқишди. Биз қишлоққа беш соатча пиёда юриб бордик”, дейди учувчи Аркадий Грачев. 

У самолётда 1,2 миллион доллар борлиги ҳақидаги саволларга ҳам жавоб берди.

“Йўқ, у ерда пул йўқ эди. Фақат шахсий пулларимиз бўлган. Тўғри, афғон халқининг беминнат ёрдами учун уларга қандайдир тарзда раҳмат айтишни хоҳладик. Биз уларга озгина пул бердик”, дейди учувчи.

Шифокор Игорь Сивороткиннинг сўзларига кўра, Falcon 10 ҳалокатидан сўнг омон қолган россияликлар музлаб қолмаслиги учун барча керакли нарсаларни йиғиб, самолётда ўзларига жой ажратган. Фельдшер биринчи тунни улар билан самолёт ичида ўтказган ва эртаси куни эрталаб у ёрдам излаб кетган.

Унинг сўзларига кўра, яқин атрофдаги қишлоққа етиб боргач, маҳаллий аҳолига ўзи ва шериклари билан содир бўлган воқеани имо-ишоралар билан тушунтира бошлаган. 

“Кейин бироз инглизча гапирадиган бир киши келди. Биз у билан келишиб олдик ва улар менга сунъий йўлдош орқали боғланиш учун телефон берди. Мен маъмурларимизга қўнғироқ қилдим ва вазиятни айтдим", деб тушунтирди Сивороткин.

Учувчи Аркадий Грачевнинг қўшимча қилишича, Афғонистон халқи экипаж аъзоларини ака-ука сифатида қабул қилган. Экипаж аъзолари шифохонада бўлганида, ҳар беш дақиқада уларнинг олдига келиб, соғлиғидан хабар олиб туришган.  

Учувчи самолёт техник носозликлар туфайли ҳалокатга учраганини ҳам қистириб ўтди. Унга кўра, борт йиқилмаган, экипаж самолётни тоғ чўққисига қўндиришга муваффақ бўлган. 

Омон қолган иккинчи учувчи Дмитрий Беляковнинг айтишича, ҳалокатга "афтидан ёқилғи билан боғлиқ муаммо" сабаб бўлган.

Россия Тергов қўмитаси Афғонистонда Falcon 10 ҳалокатининг устувор версияси сифатида двигателнинг носозлигини кўриб чиқмоқда. Ҳозирда терговчилар тинтув ўтказаётгани айтилмоқда.