Адвокатлар Капитолийга ҳужум бўйича Трамп билан ишлашни хоҳламаяпти

Америкалик адвокатлар ўз обрўсига путур етказишдан қўрқиб, Капитолийга бостириб кирилиши иши бўйича АҚШнинг собиқ президенти Дональд Трамп билан ишлашни истамаяпти. Бу ҳақда кеча, 26 июль куни “Rolling Stone” журнали хабар берди.

Айтилишича, Трамп 2023 йил 19 июлда Капитолийга бостириб кириш иши бўйича айбланганидан кейин янги адвокатларни жалб қилишга уриниб кўрган. Бироқ, адвокатлар собиқ президент билан ишлашдан бош тортмоқда, чунки улар бу ишни "ютқазиши" тайин деб ҳисобламоқда. 

Шунингдек, адвокатлар агар Трамп билан ишлашга рози бўлса, бошқа мижозларини ҳам йўқотишдан қўрқмоқда. Бундан ташқари, собиқ президент ўз жамоасини тез-тез алмаштириб турувчи “қийин мижоз” сифатида ҳам танилган.

Маълумот учун, 2021 йилнинг 6 январида ўша пайтда Америка етакчиси бўлган республикачи Трамп тарафдорлари демократ Байден ғалаба қозонган 2020 йил ноябрида бўлиб ўтган президентлик сайлови натижаларини тасдиқлашга тўсқинлик қилиш мақсадида, Конгресс биносига бостириб кирган. Орадан 2 йил ўтиб, жорий йилнинг май ойида АҚШ Бош прокурори Меррик Гарленд ҳужум иштирокчиларига нисбатан 600 дан ортиқ айблов эълон қилинганини билдирган.