Абрамович солиқ тўлашдан бўйин товлашда гумон қилинмоқда – ОАВ

Россиялик бизнесмен ва “Челси” клубининг собиқ эгаси Роман Абрамович Deloitte аудиторлик компанияси ҳамда MeritServus корпоратив хизматлар фирмаси ёрдамида солиқ тўлашдан бўйин товлаган бўлиши мумкин. Бу ҳақда минглаб ҳужжатлар сизиб чиқиши асосида ўтказилган журналистик суриштирувга таяниб, BBC хабар берди.

Тергов маълумотларига кўра, 2006 йилда Amiscan Investments компаниясига тегишли активлар, жумладан, Ғарбий Сассексдаги қаср, Лондондаги квартира, Франция жанубидаги кўчмас мулк, хусусий самолётлар, вертолётлар ва Pelorus яхтаси Британия Виржиния оролларида рўйхатдан ўтган бош компанияга ўтказилган. Мазкур битимга оид ҳужжатлар 2003 йил санаси билан расмийлаштирилгани айтилмоқда.

Суриштирувда Deloitte компаниясининг Кипрдаги бўлинмаси ушбу ҳужжатларни кўриб чиққани ва 672 миллион долларлик активлар ҳисоботларда акс эттирилмаган молиявий ҳужжатларни тасдиқлагани ҳақида маълумот берилган.

Журналистлар, шунингдек, Кипрдаги ҳисобларида қарийб 2 миллиард доллар бўлган Kravin Investments ва Абрамовичнинг бизнес активларида 10 миллиард доллардан ортиқ маблағ билан боғлиқ Electus Investments компаниялари фаолиятини ҳам ўрганган.

Суриштирув муаллифларининг билдиришича, ушбу компаниялар бўйича фоиз даромадларига солинадиган Кипр солиғини тўламаслик учун санаси ўзгартирилган ҳужжатлар тайёрланган бўлиши мумкин.

Ҳозирда Туркияда яшаётгани тахмин қилинаётган Абрамович Жерси оролида жиноий тергов доирасида текширилмоқда. Унинг 5,4 миллиард фунт стерлинг, яъни тахминан 7,1 миллиард долларга тенг активлари музлатилган.

Бизнесменнинг юридик жамоаси эса билдирилган гумонларни рад этмоқда. Ҳимоячиларнинг таъкидлашича, Абрамович компанияларнинг кундалик бошқарувида иштирок этмаган ва ҳужжатларни қалбакилаштиришга рухсат бермаган.

Deloitte Cyprus ўз фаолиятида қонун талабларига амал қилганини маълум қилган. Компания вакиллари ҳужжатлар 20 йилдан ортиқ вақт аввалги даврга тегишли экани ва улардан фойдаланиш имконияти чеклангани сабабли тафсилотлар бўйича изоҳ беришдан бош тортган.

Маълумот учун, Роман Абрамович 2003-2022 йилларда “Челси” футбол клубига эгалик қилган. Унинг раҳбарлиги даврида лондонликлар беш марта Англия Премьер-лигасида ва икки марта Чемпионлар лигасида ғолиб бўлган. 2022 йилда Россиянинг Украинага қарши урушидан кейин жорий этилган санкциялар фонида клуб сотилган эди.