50 ёшли Оксана Чусовитина қачон нафақага чиқишини айтди

1992 йилги Олимпия ўйинлари чемпиони Оксана Чусовитина спорт фаолиятини қачон якунлаши ҳақида фикр билдирди. Ҳозирда 50 ёшда бўлишига қарамай мусобақаларда иштирок этиб келаётган гимнастика юлдузи спорт энди унга завқ келтирмаслигини англагач, уни тарк этишини айтди. Бу ҳақда Чусовитина “Odds” нашрига берган интервьюсида маълум қилди.

“Бир куни эрталаб уйғониб, ташқарига чиқаман ва шу билан барчаси тугайди. Менга бу энди керак эмасдек туюлади. Бу, эҳтимол, психологик ёки физиологик масала ҳам бўлмас. Мен шунчаки спорт менга энди завқ бермаётганини англайман. Ана ўша куни фаолиятимни якунлайман”, дейди Чусовитина.

Шунингдек, Чусовитина 2028 йилги Олимпиадада қатнашиши бўйича ҳозирча аниқ режа қилмаётганини таъкидлади.

“Ҳозирги биринчи мақсадим 2026 йилги Осиё ўйинлари. Кейин эса вазиятга қараб қарор қиламан. Агар хоҳишим бўлса, албатта ҳаракат қиламан. Энг муҳими, кейин уриниб кўрмаганим учун афсусланмаслик”, дейди у.

Маълумот учун, Оксана Чусовитина спорт гимнастикаси тарихидаги энг ноёб спортчилардан бири ҳисобланади. У СССР, Германия ва Ўзбекистон терма жамоалари сафида 8 марта ёзги Олимпия ўйинларида (1992, 1996, 2000, 2004, 2008, 2012, 2016, 2020) иштирок этган.

1992 йил Барселона Олимпиадасида у бирлашган жамоа таркибида жамоавий баҳсларда олтин медални қўлга киритган. Шунингдек, 2008 йил Пекин Олимпиадасида Германия терма жамоаси сафида таяиб сакраш баҳсида кумуш медалга сазовор бўлган.