2025 йилда Ўзбекистонда неча киши иш билан таъминлангани айтилди

Жорий йилнинг бошидан шу кунга қадар 5 миллион аҳолининг бандлиги таъминланди. Бу ҳақда Президент Шавкат Мирзиёев бугун, 29 август куни Тошкентдаги “Янги Ўзбекистон” боғида бўлиб ўтаётган мамлакат мустақиллигининг 34 йиллигига бағишланган байрам тадбирида маълум қилди.

Мирзиёев мамлакатда минглаб замонавий корхоналар, ижтимоий-иқтисодий инфратузилма объектлари қад ростлаётганини айтди. Президентга кўра, бу йил жами 35 миллиард доллар инвестиция эвазига 9 мингга яқин янги корхона, хизмат кўрсатиш мажмуалари барпо этилиши режалаштирилган. Мустақиллик байрами арафасида эса 4 миллиард долларлик 79 та йирик объект ишга туширилган.

Давлат раҳбарининг қўшимча қилишича, ўтган даврда биргина кичик ва ўрта тадбиркорлар сони 2 карра кўпайган. Айни пайтда ушбу тармоқда 10 миллиондан ортиқ аҳоли меҳнат қилиб, даромад топмоқда.

Унинг сўзларига кўра, йил бошида 5,5 миллион аҳоли бандлигини таъминлаш режалаштирилган, аммо йилнинг саккиз ойдаёқ 5 миллионлик режа уддаланган.

Қолаверса, шу йилнинг ўзида мамлакатда меҳнат фаолиятини амалга ошириш учун четда ишлаётган 700 минг фуқаро Ўзбекистонга қайтган.

Эслатиб ўтамиз, аввалроқ Ўзбекистонда жорий йилнинг 1 июль ҳолатига кўра, камбағаллик даражаси 6,8 фоизни ташкил қилгани ҳақида хабар берилган эди. Биринчи ярим йилликнинг ўзида 3 миллиондан зиёд аҳоли даромадли меҳнатга жалб қилинган.