113 йиллик коньяк ва французча меню. Трампни инглизлар нималар билан сийлади?

Британия қироллик оиласи АҚШ Президенти Дональд Трампда унутилмас таассурот қолдириш учун жуда катта ҳаракат қилди ва 17 сентябрь куни унинг шарафига давлат банкети уюштирди.

Банкет Виндзор қасридаги авлиё Жорж залида бўлиб ўтди. Унинг ички кўриниши бир вақтнинг ўзида ҳам ўрта асрлар тўй-ҳашамларини, ҳам “Гарри Поттер” фильмини эслатарди.

Давлат банкети – бу ҳашаматли дастурхон орқали дипломатия. Давлат ташрифининг томошабоп кульминацияси – олтин ва кристалл жилоси остида нутқлар, шоҳона тостлари, фанфарлар ва нозик таомлар билан тўлган тантана. Нозик формадаги персонал гўё параддаги аскарлардек безакли ва интизомли. Идиш-тoвoқлар миллиметргача ҳисобланган ҳолда, линейка бўйича жойлаштирилган. Жами 160 нафар меҳмон учун 1452 та идиш-тoвoқ, ҳар бир меҳмон учун эса бешта бокал ва фужер қўшиб ҳисобланган.

Трамп ташрифини нишонлаш учун ўтказилган банкетда меҳмонларга французча менюдан таомлар тортилди, улар қуйидагилар эди:

• Хампшир крес-салатидан тайёрланган панна-котта, пармезан пишлоғидан печенье бедана тухумлари салати билан;
• Норфолк жўжаси ва цуккинидан тайёрланган рулет тимьянли ёрқин соус билан;
• Кент малинасидан тайёрланган шарбат қўшимчаси ва енгил пиширилган “Виктория” навли олхўри билан ванилли музқаймоқ.

Меҳмонларга ажойиб вино танлови ҳам таклиф қилинди:

• Wiston Estate, Cuvée 2016 йил;
• Domaine Bonneau de Martray, Corton-Charlemagne, Grand Cru 2018 йил;
• Ridge Vineyards, Monte Bello, 2000 йил;
• Pol Roger, Extra Cuvée de Réserve, 1998 йил.

Кечки овқатдан кейинги ичимликлар рўйхати эса рамзий маъноларга бой эди. Унда 1945 йилги портвейн бор эди – бу Трампнинг АҚШнинг 45-президенти сифатидаги мақомини англатарди. Гарчи Трампнинг ўзи умуман ичмаса-да.

Шунингдек, 1912 йилги коньяк ҳам бор эди – бу Дональд Трампнинг онаси Мэри Энн Маклауд туғилган йил, у Шотландиянинг Льюис оролидаги қишлоқда дунёга келган.

Шу рамзлар қаторида “Трансатлантик” номли коктейл ҳам бор эди – у Johnnie Walker вискиси асосида тайёрланиб, пекан ёнғоғидан тайёрланган кремли печенье ва британча маршмэллоу зефири билан тортилади.

Мусиқа ва кино юлдузлари ўрнига бизнес юлдузлари

Виндзордаги банкетда одатдаги ижтимоий ҳаёт ва кино экранларидан таниш бўлган машҳур юлдузлар йўқ эди. Ҳатто қироллик тадбирларининг доимий меҳмонлари бўлган сэр Дэвид Бекхэм ва сэр Элтон Жон ҳам келмади.

Бу сафар авлиё Жорж зали сиёсатчилар ҳамда бизнес юлдузлари билан тўлди.

Apple компанияси раҳбари Тим Кук президентнинг қизи Тиффани Трамп ёнида ўтирди. Газета магнати Руперт Мёрдок эса Британия Бош вазири Кир Стармернинг аппарати раҳбари Морган Максуини ёнидан жой олди. Қизиғи шундаки, яқинда Трамп Мёрдок концернига миллиард долларлик даъво аризаси билан судга мурожаат қилганди. Мёрдок Максуини билан нима ҳақида суҳбатлашгани қизиқ.

Ҳар бир меҳмонга аниқ жой ажратилган бўлиб, унда шахсий исми ёзилган таблича қўйилган эди.

Қадрли меҳмон Дональд Трамп қирол Чарльз ва Уэльс маликаси Кэтрин орасида, марказда ўтирди.

Трампнинг ўрнига қўйилган табличада “Америка Қўшма Штатлари Президенти” деган ёзув бор эди. У катта ҳарфлар билан ёзилганди – худди Трамп ижтимоий тармоқларда ўз постларини ёзгандек.

Қирол ва Трампнинг рўпарасида қиролича Камилла, биринчи хоним Мелания Трамп ва Уэльс шаҳзодаси Уильям ўтирди.

АҚШ элчиси Уоррен Стивенс қиролнинг опаси, малика Анна ва Молия вазири Рейчел Ривз орасидан жой олди.

Бош вазир Кир Стармер эса инвестиция компанияси Blackstone раҳбари Стивен Шварцман билан ёнма-ён ўтирди. Айни Трамп ташрифи муносабати билан Blackstone Британияга 90 миллиард фунт сармоя киритиш режасини эълон қилганди.

Консерваторлар раҳбари Кеми Баденок OpenAI бошлиғи Сэм Алтманнинг ёнида ўтирди.

Банкетда, шунингдек, АҚШ Давлат котиби Марко Рубио, Трампнинг махсус элчиси Стив Уиткофф, Британия Ташқи ишлар вазирлигининг янги раҳбари Иветт Купер ва Британия Бош вазири ўринбосари Дэвид Лэмми ҳам қатнашди.