11 сентябрга оид ўнлаб махфий ҳужжатлар очиқланди

Кеча, 11 сентябрь куни АҚШ Марказий разведка бошқармаси (МРБ) 1998–2001 йилларга оид 71 та президентлик разведка ахборотномасини махфийликдан чиқарди. Ҳужжатлар 11 сентябрь терактининг тайёргарлигига тааллуқли. Бу ҳақда МРБ хабар берди.

Қайд этилишича, фожиадан бир неча йил олдин пайдо бўлган “Ал-Қоида” таҳдиди ва унинг АҚШга ҳужум қилиш режалари ҳақидаги огоҳлантиришларни ошкор қилувчи маълумотлар эълон қилинган.

“Бугун директор Жон Рэтклифф 11 сентябрдаги террорчилик хуружларининг 25 йиллик хотираси муносабати билан ҳамда Президент Дональд Трампнинг шаффофликни таъминлаш бўйича тарихий ташаббусига мувофиқ, Президент учун тайёрланадиган кунлик ахборотномалардан 71 та ҳужжатни махфийликдан чиқарди”, дейилади МРБ баёнотида.

Хабар қилинишича, махфийликдан чиқарилган 100 дан ортиқ саҳифадан иборат ҳужжатлар 2004 йилдан бери 11 сентябрь воқеаларига оид таҳлилий материалларнинг энг кенг миқёсли ошкор этилиши бўлган.

МРБнинг билдиришича, ахборотномалар идора таҳлилчилари мавжуд маълумотларнинг танқислиги, тўлиқ эмаслиги ва парча-парчалиги шароитида мамлакат раҳбариятини тайёрланаётган ҳужумлардан қандай огоҳлантиришга ҳаракат қилганини кўрсатади.

Маълумотларга кўра, 2001 йил 11 сентябрь эрталабида 19 нафар террорчи АҚШда тўртта йўловчи самолётини эгаллаб олган, улардан иккитаси Бутунжаҳон савдо марказининг баланд биноларига бориб урилган. Учинчиси Пентагон биносига урилган, тўртинчиси Пенсильвания штатидаги Шанксвилл шаҳри яқинида қулаган. Ҳодиса оқибатида 2 977 киши ҳалок бўлган, яна 24 киши бедарак йўқолган.

Эслатиб ўтамиз, аввалроқ 2001 йил 11 сентябрдаги терактларнинг асосий ташкилотчиси деб гумон қилинган шахс ва Гуантанамо базасида сақланаётган унинг яна уч нафар шериги 2028 йилда суд олдида жавоб бериши маълум бўлган эди.

Шунингдек, Нью-Йоркда 2 977 та ёруғлик сочувчи дрон ёрдамида эгизак миноралар сурати гавдалантирилиб, 11 сентябрь терактлари қурбонлари хотираси ёд этилгани ҳақида хабар берилган эди.