Ҳусанов жамоамизнинг энг ёқимтой футболчисига айланиб бўлди – Гвардиола

“Манчестер Сити” бош мураббийи Хосеп Гвардиола Англия чемпионати 27-туридан ўрин олган “Тоттенхэм”га қарши баҳсдан кейин матбуот анжуманида қатнашиб, “шаҳарликлар”нинг ўзбекистонлик ҳимоячиси Абдуқодир Ҳусанов ҳақида илиқ сўзларни айтди.

“Менга энг ёққан тарафи Ҳусанов аллақачон жамоа кийим алмаштириш хонасида ҳамманинг ёқимтойига айланиб бўлган. Бугун у ҳатто тиш чўтка ва бошқа лаш-луш соладиган сумкасиз келди, яъни у футбол ўйнаш учун келди. Ҳусанов билан гаплашганингизда, фақат кулиб туради, лекин у ишончли футболчи. У чизиқларни буза оладиган қобилиятга эга. Албатта, у ҳали ривожланиши керак. Мен тезлиги юқори бўлган кўп футболчиларни кўрганман, Ҳусанов улардан бири. Ҳамма уни яхши кўради, ҳеч нарсадан нолимасдан меҳнат қилади, шунақанги камтарки, ишончим комил, мухлисларимиз уни яхши кўриб қолади. “Челси”га қарши дебют ўйинида қабул қилиб олган “зарба”дан сўнг ўзига келиш осон бўлмади”, дейди Гвардиола.

Маълумот учун, “Тоттенхэм”-“Манчестер Сити” баҳсида “шаҳарликлар” Эрлинг Холанднинг ягона голи эвазига учрашувда ғалабани расмийлаштирди. Ҳозирда “Ман Сити” 47 очко билан Англия чемпионати турнир жадвалида 4-ўринни эгаллаб турибди.