Ҳибсдаги “тиллага кўмилган келин” эрига қарши кўрсатма берди

“Ванлик Қора Ҳайдар” лақаби билан танилган Меҳмет Фотиҳ Танчаланнинг рафиқаси Чағли Ўз Танчаланнинг прокуратурада берган кўрсатмалари маълум бўлди. У эрининг “тақинчоқлар ижарага олинган эди” деган баёнотини рад этиб, тилла буюмлар сотиб олинганини айтди. Бу ҳақда “Haberler” хабар берди.

Унинг айтишича, тўйда эълон қилинган 43 миллион турк лираси қийматидаги тақинчоқлар ҳақидаги маълумот ҳам тўқиб чиқарилган. Танчалан Молиявий жиноятларни тергов қилиш қўмитаси – MASAK (Mali Suçları Araştırma Kurulu) ҳисоботлари ва қимматбаҳо автомобиллар ҳаракати бўйича ҳам тушунтириш бериб, эрини кўз-кўз қилиш учун мавжуд бўлмаган пул билан мақтанганликда айблаган.

Чағли Ўз Танчалан эри Меҳмет Фотиҳ Танчаланнинг тақинчоқлар ҳақидаги баёнотига зид равишда, тилла буюмлар ижарага олинмагани, сотиб олинганини билишини айтган. У тўйда тақилган барча тилла буюмлар кеча охирида эри томонидан олиб кетилганини, кейинчалик улар Мурадийеда ўтказилган тинтув вақтида ўтинхонадаги чамадондан топилганини билдирган.

Чағли Ўз Танчалан тўйда 43 миллион лира йиғилгани ҳақида маълумоти йўқлигини, эълон қилинган исмларнинг аксарияти тўқиб чиқарилганини ва бу эълонлар кўз-кўз қилиш мақсадида қилинганини айтган.

Чағли Ўзнинг кўрсатмасига кўра, унаштирув маросимида унга маржон ва иккита билагузук тақилган, тож ҳамда белбоғ эса заргардан вақтинча олинган. Унинг айтишича, маржон ва билагузукларни кейинчалик Меҳмет Фотиҳ Танчалан ва унинг оиласи сотиб олган. Мазкур тақинчоқлар тўйда ҳам келиннинг ўзига тақилган.

Чағли Ўз жорий йилнинг 6 сентябрь куни Ван шаҳрида ўтказилган тўйни эри ташкиллаштирганини, тадбир харажатлари қайси маблағ ҳисобидан қопланганини билмаслигини билдирган. Унинг айтишича, тўй давомида ўзига тақилган барча тилла буюмларни кеча якунида эрига берган. Шундан сўнг у дугоналари билан меҳмонхонага, эри эса дўстлари билан бошқа жойга кетган.

Кейинчалик тилла буюмлар Мурадийеда ҳуқуқ-тартибот ходимлари ўтказган тинтув вақтида ўтинхонадаги чамадондан топилган. Чағли Ўз айрим билагузукларнинг сохта эканини кейинчалик янгиликлардан билганини айтган. У эридан нега бунчалик кўп тилла борлигини сўраганида, Меҳмет Фотиҳ Танчлан “Бу қабила ҳудуди, тўйларда ҳамма шунча тилла тақади”, деб жавоб берган.

Тўйда “Ҳайдар Бейнинг тўйига келган совғалар, тақинчоқлар ва IBAN орқали тушган пуллар билан бирга 43 миллион лира” йиғилгани ҳақида эълон қилингани ҳам тергов доирасида ўрганилмоқда. Чағли Ўз бундай миқдордаги пул йиғилганини билмаслигини, эълон қилинган исмларнинг аксарияти тўқиб чиқарилганини айтган.

Унинг таъкидлашича, эрининг кўрсатмаси билан тўйда аслида олинмаган пуллар ҳақида ҳам эълон қилинган. Чағли Ўз бу орқали Меҳмет Фотиҳ Танчалан ўзига катта миқдорда пул келганини одамларга кўрсатишни истаганини билдирган. У эрини мавжуд бўлмаган маблағни бордек кўрсатиб, одамлар олдида мақтанишни яхши кўрадиган инсон сифатида таърифлаган.

MASAK текширувларида аниқланган пул ўтказмалари бўйича ҳам Танчаланнинг изоҳи олинган. У эри билан ўртасидаги қарийб 1,5 миллион лиралик пул ҳаракатларини қарз олди-бердиси билан изоҳлаган.

Шунингдек, у онасига 221 та операция орқали қарийб 5,2 миллион лира юборганини, бу маблағлар онасининг эҳтиёжлари, ижара ва кундалик харажатлари учун берилганини айтган. Онасидан 303 та операция орқали қарийб 6 миллион 69 минг лира келгани ҳақида эса бу аввал жамғариб туриш учун онасига юборган ва кейинчалик зарурат туғилганда қайтариб олган ўз пули эканини билдирган.

Меҳмет Фотиҳ Танчаланнинг жияни Муҳаммед Саит Танчалан ҳисоб рақамидаги пул ҳаракатларига ҳам изоҳ берилган. Чағли Ўз Танчалан эри алимент бўйича суд иши сабабли ўз ҳисоб рақамларидан фойдалана олмаганини, шу боис айрим ҳолларда пул юбориш учун жиянининг ҳисобидан фойдаланганини айтган. MASAK маълумотларида ушбу ҳисоб рақам орқали 11 та операцияда 644 минг лиралик пул ҳаракати аниқлангани қайд этилган.
 
Қимматбаҳо автомобилларнинг оила аъзолари ўртасида қайта-қайта расмийлаштирилиши ҳам терговда кўриб чиқилган. MASAK бундай ҳаракатларни мол-мулк манбасини яшириш, молиявий кузатувни қийинлаштириш ва эҳтимолий хатлов чораларини четлаб ўтишга хизмат қилиши мумкин бўлган “қатламлаш” жараёни сифатида баҳолаган.

Танчалан эса ушбу баҳолашни рад этиб, автомобиллар махсус давлат рақамларини янги машинага ўтказиш учун қисқа муддатга оила аъзолари номига расмийлаштирилганини айтган. У бундай ҳаракатларнинг пулни легаллаштиришга алоқаси йўқлигини таъкидлаган. Ўз номидаги қимматбаҳо автомобилни эса тижорий фаолиятидан олган даромадлари ҳисобидан сотиб олганини билдирган.

MASAK ҳисоботида Танчаланнинг 2020 йилдан буён декларация қилган қарийб 1,1 миллион лиралик фойдаси билан унинг намойиш этган турмуш тарзи ўртасида номувофиқлик борлиги ҳам қайд этилган. Чағли Ўз Танчалан эса ижтимоий тармоқлар ва савдо фаолиятидан даромад олганини айтиб, фақат сўнгги 3 ойда косметика маҳсулотларини реклама қилиш орқали Trendyol платформасидан 2,5 миллион лира даромад қилганини билдирган. Унинг айтишича, бу даромадлар бўйича ҳисоб-фактура расмийлаштирилган.

Танчалан MASAK ҳисоботида хато бўлиши мумкинлигини, солиқ ёки тижорий декларацияларида камчилик аниқланса, уларни тўлдиришга тайёр эканини ҳам айтган.

Шу билан бирга, у ўзининг ноқонуний пулларга алоқаси йўқлигини таъкидлаб, эри кўз-кўз қилишни ва мақтанишни яхши кўришини билдирган. Танчаланнинг сўзларига кўра, эри ижтимоий тармоқларда мавжуд бўлмаган маблағни бордек кўрсатган, дабдабали ҳаёт тарзини эса одамлардан қарз олиб давом эттирган.

Ван Республика Бош прокуратураси ҳозирда MASAK маълумотлари, банк операциялари, қимматбаҳо автомобилларнинг қайта расмийлаштирилиши, тўйда тақилган тилла буюмлар ҳамда гумонланувчилар ва уларнинг яқинлари ўртасидаги пул ҳаракатларини ўрганишда давом этмоқда.

Эслатиб ўтамиз, Туркиянинг Ван шаҳрида ижтимоий тармоқларда машҳур бўлган мода дизайнери ва тадбиркор Чағли Ўз ҳамда “Ванли Қора Ҳайдар” лақаби билан танилган блогер Меҳмет Фотиҳ Танчаланнинг тўйида уларга тақилган катта миқдордаги олтин ва пуллар текширувга сабаб бўлган эди. Келиннинг ўзига 52 килограмм олтин, куёвга эса 44 миллион турк лираси тақилгани айтилган. Тергов доирасида куёв Меҳмет Фотиҳ Танчалан ва унинг рафиқаси ҳам ҳибсга олинган эди.