Ҳайдовчи жазоланди. Муаммо эса ўз ўрнида қолди (видео)

QALAMPIR.UZ'га 23 декабрь куни Тошкент вилояти Тошкент туманидан пойтахтга қатновчи автобуслардан бирининг ҳоли хароблиги ҳақида мурожаат келиб тушган эди. Унда фуқаролар жамоат транспортининг носозлиги ва ҳудуддаги аҳоли учун кичиклик қилаётганини айтиб чиққан. Ҳолат юзасидан туман ҳокимлиги муносабат билдириб, ўша вақтда ушбу автобус бошқарувида бўлган ҳайдовчи жазоланганини маълум қилди. 

“Видеолавҳада акс этган ҳолат юзасидан тегишли ўрганиш ишлари олиб борилди ва жамият ҳайдовчисига Йўл ҳаракати хавфсизлиги хизмати ходимлари томонидан қонунчиликда белгиланган тартибда тегишли чоралар кўрилди”, дейилади ҳокимлик муносабатида

Шунингдек, ҳокимликнинг қайд этишича, ҳозирда ҳудудга Хитойдан 40 дона автобус олиб келиниши бўйича ишлар амалга оширилмоқда ва ушбу янги автобуслар 2026 йилнинг биринчи чорагида йўлга қўйилиши режалаштирилган. 

“Жамоат транспорти тизимини яхшилаш, аҳолига кўрсатилаётган хизматлар сифатини ошириш бўйича ишлар изчил равишда давом эттирилади ва бу борада жамоатчилик фикри инобатга олинади”, дейилади муносабатда.

Бундан ташқари, туман ҳокимлиги вакиллари аҳолидан тирбандлик ва юклама юқори бўлган пайтларда шошма-шошарликка йўл қўймасдан, бироз сабр билан кейинги автобусни кутишни сўраган. 

Аҳолининг эса кутишлардан сабри тўлган. QALAMPIR.UZ'га кеча, 24 декабрда ҳам айнан ушбу йўналишдаги автобуслардан шикоятлар келиб тушди. Мурожаатчиларнинг айтишича, улар автобусларда одатдагидек эшикларга осилган ёки диққинафас бўлган ҳолда йўлга чиқишган. 

Бундай ҳолга тушишни хоҳламаган фуқаролар эса, ҳокимлик айтганидек, кейинги автобусни кутишга қарор қилган. Аммо бахтга қарши, кейинги транспорт аввалгисидан-да йўловчига сероб бўлиб, бекатга етиб келган. 

“Бизга муаммонинг ечими керак, ҳайдовчининг жарима тўлаши эмас”, дейди мурожаатчилардан бири.

Нодир Шукуров