ҲАМАСнинг Telegram'даги расмий канали чекланди
Олам
−
24 Октябрь 2023
4700Telegram Google Play қоидаларига мувофиқ, мобиль қурилмалар орқали ҲАМАСнинг расмий каналига киришни чеклади. Бу ҳақда ТАСС хабар берди.
Маълумотга кўра, Андроид тизими учун илованинг сўнгги версиясидан фойдаланувчиларга юборилган хабарда обуна бўлинган “айрим каналларга кириш Google Play қоидаларига мувофиқ чекланиши" билдирилган.
Эндиликда мобиль қурилмадан ҲАМАС ҳаракати каналига кирмоқчи бўлганлар учун тақиқ билдиришномаси кўринади.
Айни пайтда, нашрлар Apple қурилмасидан каналга киришга уринганлар ҳам шунга ўхшаш чекловларга дуч келаётгани ҳақида ёзган.
"ҲАМАСнинг ҳарбий қаноти “Ал-Қассам бригадалари”нинг канали ҳам блокланган. Шу билан бирга, ҳаракат матбуот котиби Иззат ар-Ришқанинг канали, ҲАМАСнинг иттифоқчилари бўлмиш “Исломий жиҳод” ва “Ҳизбуллоҳ” каналлари ҳали ҳам ишлаяпти", дейилади бу ҳақдаги хабарда.
Мессенжер ҲАМАС каналларига кириш ҳуқуқини сақлаб қолмоқчи бўлган Android фойдаланувчиларига мобиль иловани Play market орқали эмас, тўғридан тўғри Telegram веб-сайтидан юклаб олишни таклиф қилди. Каналлар мессенжернинг веб-версиясида ҳам ишламоқда.