ҲАМАС вакили Москвага борди

ҲАМАС ҳаракати сиёсий бюроси бошлиғининг ўринбосари Мусо Абу Марзук бугун, 23 октябрь куни Россия пойтахти Москвага борди. Бу ҳақда РИА Новости агентлиги хабар берди. 

Билдирилишича, у Россиянинг бир нечта расмийлари билан учрашувлар ўтказишни режалаштирган.

Бу Мусо Абу Марзукнинг Ғазо секторидаги уруш бошланганидан бери Москвага бешинчи марта ташриф буюриши. Марзук охирги марта Россияга июнь ойида борган эди. Ўша пайтдаги музокаралардан бири ҲАМАС гаровида бўлган икки нафар россиялик тўғрисида бўлган. Сиёсий бюро бошлиғининг ўринбосарининг айтишича, ҲАМАС Исроил билан сулҳ тузиш тўғрисида келишувга эришилмагунча россияликларни озод қилмайди.

Маълумот учун, Мусо Абу Марзук 1992 йил ҲАМАС сиёсий бюросининг биринчи раҳбари этиб сайланган. 1995 йилда у АҚШ томонидан террорчи деб топилган ва Нью-Йоркда ҳибсга олиниб, 1997 йилгача Америка қамоқхонасида сақланган. У АҚШга қайтиб келмаслик шарти билан озод қилинган ва Иорданияга депортация қилинган. Озодликка чиққандан сўнг ҲАМАС сиёсий бюроси бошлиғининг ўринбосари этиб тайинланган.

2018 йил 30 март куни Ғазо секторида "буюк қайтиш марши" бошланганлиги сабабли Абу Марзук сиёсий бюро аъзоси сифатида  Москвага борган. У ерда Россия Ташқи ишлар вазирининг ўринбосари, Россия федерацияси Президентининг Яқин Шарқ бўйича махсус вакили Михаил Богданов билан музокаралар ўтказган. Россия Ташқи ишлар вазирлиги Ғазо сектори ва Исроил чегарасида Исроил қўшинлари билан қонли тўқнашувларда қатнашган фаластинликларга қарши Исроилнинг куч ишлатишини "мутлақо қабул қилиб бўлмайди" деб атаб, томонларни келишувга чақирганди.

Эслатиб ўтамиз,  жорий йил бошида ҳам Мусо Абу Марзук бошчилигидаги делегацияси Москвада Россия Президентининг Яқин Шарқ ва Африка мамлакатлари бўйича махсус вакили, Россия Ташқи ишлар вазири ўринбосари Михаил Богданов билан учрашганди.

Муҳаммад Ҳодиев