ҲАМАС дарҳол музокараларга тайёрлигини эълон қилди

Кеча, 7 сентябрь куни ҲАМАС Исроил билан музокараларга дарҳол тайёр эканини маълум қилди.

Ҳаракатнинг тегишли баёноти АҚШ Президенти Дональд Трампнинг “сўнгги огоҳлантириши”дан кейин эълон қилинган. Трампнинг айтишича, Исроил унинг гаровдагиларни озод қилиш бўйича келишув шартларини қабул қилган ва энди ҲАМАС ҳам бунга рози бўлиши шарт.

“Мен огоҳлантирдим. ҲАМАС оғир оқибатларга дуч келади. Бу менинг сўнгги огоҳлантиришим, бошқа бўлмайди”, дея Truth Social тармоғида ёзган Трамп. 

Ушбу постдан сўнг, кеча, 7 сентябрь куни кечқурун ҲАМАС “урушни тўхтатиш ва барча ҳибсдагиларни озод қилиш” мақсадида музокара столига ўтиришга тайёр эканини билдирди. Ҳаракат аъзоларининг сўзларига кўра, аввалроқ АҚШ воситачилари орқали сулҳга эришишга қаратилган айрим таклифлар олинган.

Ҳаракатга кўра, ҲАМАС гаровга олинган исроилликларни озод қилиш эвазига Исроилдан қуйидагиларни талаб қилмоқда: урушни тўлиқ тўхтатиш ҳақида аниқ баёнот бериш, қўшинларни Ғазо секторидан бутунлай олиб чиқиш ва бу ҳудудни бошқариш учун мустақил фаластинликлардан иборат қўмита тузиш.

Исроилнинг янги операцияси 

Сўнгги кунларда Исроил Ғазо шаҳрида қуруқликдаги операцияни кенгайтирди. Махсус операция доирасида ҲАМАСнинг таянч нуқталарини эгаллади. Бундан ташқари, Исроил мудофаа армияси (ЦАХАЛ) Хон-Юнис шаҳрида “гуманитар зона” ташкил этилишини эълон қилди ва Ғазо шаҳри аҳолиси бу ҳудудга дарҳол кўчишни қатъий тавсия қилди.

Бу қон тўкишларнинг тарихи 2023 йилнинг 7 октябрь кунига бориб тақалади. Ўшанда ҲАМАС Исроилга йирик ҳужум уюштириб, минглаб ракеталар учирган, чегарадан ўтган ва тинч аҳоли вакилларини ўлдирган эди. Ўша куни қарийб 1200 киши ҳалок бўлди, 250 дан ортиқ одам гаровга олинди. Баъзилари кейинчалик озод қилинди ёки алмашилди, бошқалари ҳалок бўлди. Исроил бунга жавобан ҲАМАСга уруш эълон қилди. Ғазодаги Соғлиқни сақлаш вазирлигининг маълумотига кўра, Исроилнинг кенг кўламли юришида 63 мингдан ортиқ фаластинлик ҳалок бўлган, 162 мингдан ортиғи яраланган. 

Эслатиб ўтамиз, аввалроқ ЦАХАЛ Ғазо шаҳри ҳудудининг 40 фоизи устидан назорат ўрнатгани ҳақида хабар берилганди. Исроил тинч аҳолини ўз хавфсизлиги учун Ғазодан эвакуация қилишга чақирган. Исроил томонига кўра, 70 минг киши аллақачон шаҳарни тарк этган.