Ҳабиб АҚШга учиш арафасида самолётдан тушириб юборилди (видео)

Енгил вазн тоифасида собиқ UFC чемпиони Ҳабиб Нурмуҳаммедов UFC 311 турнири учун Америка Қўшма Штатларига учиш арафасида самолётдан тушириб юборилди. Бу ҳақда “American Airlines” авиакомпанияси хабар берди.

Манбага кўра, Ҳабиб самолётда фавқулодда чиқиш жойи ёнида ўтирган. Стюардесса қонун-қоидага мувофиқ ундан фавқулодда вазиятда йўловчиларга ёрдам бера олиш-олмаслигини сўраган. Аммо спортчи унинг гапини тушунмаган ва қисқа тортишув юзага келган. Кейин стюардесса Ҳабибдан бошқа жойга ўтиришни талаб қилган. Бу ҳолат эса собиқ чемпионнинг норозилигига сабаб бўлган.

“Фавқулодда чиқиш жойида ўтиришингиз тақиқланган, йўқса самолётни тарк этишингизга тўғри келади“, деган стюардесса.  

Табиийки, Ҳабиб бу ҳолатда норозилик билдирган. 

“Бу адолатсизлик. Мендан рўйхатдан ўтаётганимда инглиз тилини биласизми, деб сўраганида, мен ҳа, деб жавоб бердим. Энди нега бундай қиляпсизлар”, деди Ҳабиб.

Шундан кейин Нурмуҳаммедов экипаж билан баҳслашиб, жамоадошлари билан самолётни тарк этган.

Кейинроқ доғистонлик спортчи вазият бўйича батафсил маълумот берди.

“Менга саволлар билан мурожаат қилган аёл бошиданоқ қўпол муомала қилди. Менинг инглиз тилида яхши гапира олишимга қарамай, у мени жойимдан туриб кетишим кераклигини айтди. У бу ишни қилишга асос нима? Ирқий, миллий ёки бошқа сабабданми, билмайман. Қисқа суҳбатдан кейин у қўриқчиларни чақирди ва мени самолётдан ҳайдашди. Ўша вазиятда ўзимни хотиржам бўлишга ва провокацияга учмасликка чорладим. Менимча, улар самимийроқ муносабатда бўлганида, бундай муаммо бўлмасди”, дейди Ҳабиб.

Маълумот ўрнида, Ҳабиб Нурмуҳаммедов UFC 311 турнирида шогирдлари Ислом Махачев ва Умар Нурмуҳаммедовга секундатлик қилиш учун Лос-Анжелесга учиб кетаётган бўлган.

Эслатиб ўтамиз, 19 январга ўтар кечаси АҚШнинг Лос-Анжелес штатида 2025 йилнинг илк турнири UFC 311 бўлиб ўтади. Ушбу турнирда енгил вазн тоифаси чемпионлиги учун Ислом Махачев ва Арман Царукян ҳамда энг енгил вазн тоифаси чемпионлиги учун Мераб Двалишвили ва Умар Нурмуҳаммедов октагонга кўтарилади.