Жиззахда ота боласининг бўғзига пичоқ тиради. Унга нисбатан жиноят иши очилди

Жиззахда эркак Кореяда ишлаётган турмуш ўртоғига аччиқ қилиб, видеоқўнғироқ пайтида ўз боласининг бўғзига пичоқ тиради. Унга нисбатан жиноят иши қўзғатилди. Бу ҳақда Олий Мажлиснинг Инсон ҳуқуқлари бўйича вакили (омбудсман) хабар берди.

Маълум қилинишича, Омбудсманга Жиззах вилоятида яшовчи Б.О. набирасига отаси томонидан босим ва зўравонлик қилинаётгани бўйича мурожаат қилган. Мурожаатчи қизи К.С.нинг 2022 йилдан буён Кореяда ишлаётганини, унинг 8 ёшли ўғли эса эрининг қарамоғида қолганини ёзган. Мурожаатга илова қилинган видеоёзувда эр-хотин видеоқўнғироқ орқали жанжаллашганида, ота ўғлининг бўғзига пичоқ тирагани акс этган.

Мурожаат дарҳол Омбудсман томонидан назоратга олиниб, ҳолат унинг Жиззах вилоятидаги минтақавий вакили ҳамда Ижтимоий ҳимоя миллий агентлиги Жиззах вилояти бошқармаси билан ҳамкорликда жойига чиқиб ўрганилган. Аниқланишича, ҳозирда фуқаро К.С.нинг вояга етмаган ўғли бувиси билан яшамоқда. Бола билан суҳбат ўтказилганда, ота-онаси ўртасидаги салбий муносабатдан норози эканлигини, отаси билан яшашни хоҳламаслиги ҳамда бувиси билан қолишни исташини билдирган. Шундан сўнг фуқаро К.С.нинг вояга етмаган ўғлига бувиси вақтинчалик васий этиб тайинланди.

"Вояга етмаган фарзандига қилган ҳаракати учун отага нисбатан Жиноят кодексининг 112-моддаси 1-қисми (Ўлдириш ёки зўрлик ишлатиш билан қўрқитиш) билан жиноят иши қўзғатилган", дейилади хабарда.