ЖЧ плей-офф босқичига қайси жамоалар йўл олди?

Ҳозирда 2026 йилги Жаҳон чемпионати гуруҳ босқичининг сўнгги 3-тур учрашувлари бўлиб ўтмоқда. Айни пайтга қадар 19 та терма жамоа плей-офф босқичига чиқишни кафолатлади.

Мексика, Швейцария, Бразилия, АҚШ, Германия, Нидерландия ва Аргентина ўз гуруҳларида биринчи ўринни эгаллади.

Жанубий Африка, Канада, Марокаш, Австралия, Кот-д'Ивуар ва Япония эса иккинчи ўрин орқали кейинги босқич йўлланмасини қўлга киритди.

Шунингдек, Франция, Норвегия ва Колумбия ҳам плей-оффга чиқишни таъминлади. Бироқ мазкур жамоаларнинг гуруҳдаги якуний ўрни ҳали аниқланганича йўқ.

Учинчи ўринни эгаллаган жамоалар орасида Босния ва Герцеговина, Эквадор ҳамда Швеция энг яхши натижа қайд этиб, плей-офф босқичига йўлланма олиши аниқ бўлиб улгурган терма жамоалар қаторида ҳисобланади.

2026 йилги мундиалда плей-офф босқичида жами 32 та жамоа иштирок этади. Улардан 24 таси ўз гуруҳларида биринчи ва иккинчи ўринни эгаллаган жамоалар бўлса, яна саккизта йўлланма учинчи ўринни эгаллаган энг яхши терма жамоаларга берилади.

Мусобақанинг 1/16 финал баҳслари жорий йилнинг 28 июнидан 3 июлигача, 1/8 финал учрашувлари 4–7 июль кунлари, чорак финаллар 9–11 июль, ярим финаллар эса 14 ва 15 июль кунлари бўлиб ўтади.

Учинчи ўрин учун баҳс 18 июль куни Майамида, финал эса 19 июль куни Нью-Йоркда ўтказилади.

Маълумот учун, 2026 йилги Жаҳон чемпионати иштирокчилар сони бўйича тарихдаги энг йирик мусобақа ҳисобланади. Илк бор мундиалда 48 та терма жамоа қатнашмоқда. Бу 1998 йилдан буён ўтказилган аввалги етти мундиалга нисбатан 16 тага кўп иштирокчи дегани.

Эслатиб ўтамиз, аввалроқ 2026 йилги Жаҳон чемпионати тарихдаги энг кўп гол урилган турнир сифатида рекорд қайд этгани ҳақида хабар берилганди.