ЖЧ олдидан саудиялик футболчининг паспорти ўғирлаб кетилди

Саудия Арабистони терма жамоаси футболчиси Сауд Абдулҳамиднинг паспорти ўғирлаб кетилди. Шу сабабли ҳимоячи 2026 йилги Жаҳон чемпионати олдидан машғулот йиғинига қўшила олмади. Бу ҳақда “Reuters” хабар берди.

Саудия Арабистони футбол федерацияси 2026 йилги Жаҳон чемпионатига тайёргарлик доирасида Сауд Абдулҳамиднинг миллий терма жамоа машғулот йиғинига етиб келишининг кечикиши ҳақида расмий баёнот берди.

Маълумотга кўра, футболчи Амстердамда оиласи билан тўйда иштирок этаётган вақтда унинг машинасига ўғрилик қилинган ва шу сабабли шахсий буюмлари, жумладан паспорти ўғирланган. Натижада, у Ар-Риёдга учиб кета олмаган.

Саудия Арабистони футбол федерацияси ушбу ҳолат бўйича Спорт вазирлиги билан ҳамкорликда тергов ишларини олиб бормоқда. Шунингдек, Нидерландиядаги Саудия Арабистони элчихонаси билан биргаликда футболчига зарур ҳужжатларни тиклаш ва унинг терма жамоа йиғинига қўшилишини таъминлаш устида ишланмоқда.

Федерация ҳозирги шароитда Сауд Абдулҳамидни тўлиқ қўллаб-қувватлашини ва уни миллий терма жамоанинг лагерига соғ-омон етиб келишини кутаётганини билдирган.

Саудия Арабистони терма жамоаси 2026 йилдаги Жаҳон чемпионатида ўз гуруҳида Испания, Кабо-Верде ва Уругвай жамоаларига қарши майдонга тушади.