ЖЧ финалида танаффус 30 дақиқа бўлиши мумкин

FIFA’нинг Супербоул услубидаги танаффус шоуини жорий этиш ҳақидаги баҳсли қарори ортидан 2026 йилги Жаҳон чемпионати финалида танаффус 30 дақиқагача узайтирилиши мумкин. Бу ҳақда “The Telegraph” нашри хабар берди.

Жорий йилнинг 19 июль куни Нью-Жерсидаги “МетЛайф” стадионида бўлиб ўтадиган Жаҳон чемпионати финали учрашувида илк бор “финал шоу”си ташкил этилади. Концерт дастурида канадалик хонанда Жастин Бибер, америкалик поп юлдуз Мадонна, колумбиялик хонанда Шакира ҳамда Жанубий Кореянинг BTS гуруҳи иштирок этади. Тадбирга Coldplay гуруҳи солисти Крис Мартин бошчилик қилади.

Финал бошланишидан аввал эса 90 дақиқалик ёпилиш маросими ўтказилиши режалаштирилган. Унда актёр Том Круз, хонандалар Лаура Паузини, Николь Шерзингер, Робби Уильямс ҳамда машҳур блогер IShowSpeed иштирок этади.

Нашрга кўра, Буюк Британиянинг BBC ва ITV телеканаллари эфир режасини эҳтимолий 30 дақиқалик танаффусга мослаштиришга аллақачон киришган. Бу 11 дақиқалик концерт дастурини эфирга узатиш ҳамда биринчи бўлимдан кейинги анъанавий 15 дақиқалик экспертлар таҳлилини сақлаб қолиш имконини беради.

Концертнинг ўзи 11 дақиқа давом этади. Бироқ саҳнани ўрнатиш ва учрашув қайта бошланишидан олдин уни йиғиштириш учун қўшимча вақт талаб этилади.

Футбол қоидаларини белгилаб берувчи Халқаро футбол ассоциациялари кенгаши (IFAB) қоидаларига кўра, учрашувлар оралиғидаги танаффус 15 дақиқадан ошмаслиги лозим.

2021 йилда IFAB Жанубий Америка футбол конфедерацияси (КОНМЕБОЛ)нинг танаффусни 25 дақиқагача узайтириш таклифини рад этган эди. Қарорга кўра, бундай ўзгариш футболчиларнинг соғлиғи ва хавфсизлигига салбий таъсир кўрсатиши мумкин.

Шунга қарамай, FIFA 2025 йилги Клублар ўртасидаги жаҳон чемпионати финалида ҳам ушбу амалиётни қўллаган. Нью-Жерсида бўлиб ўтган ўша баҳсда Coldplay, Doja Cat ва Tems иштирокидаги шоу сабабли танаффус 25 дақиқага чўзилган. Худди шундай ҳолат 2024 йилги Америка кубоги финалида ҳам кузатилган. Ўшанда Шакиранинг чиқиши муносабати билан танаффус қарийб 25 дақиқа давом этган.

Эслатиб ўтамиз, аввалроқ Испания терма жамоаси Францияни 2:0 ҳисобида мағлуб этиб, 2026 йилги Жаҳон чемпионати финалига чиққан биринчи жамоага айланди. Иккинчи финалчи Англия ҳамда Аргентина ўртасидаги ярим финал ғолиби бўлади.