Жанжалга сабаб бўлган ҳакам ўйинлардан четлатилди (видео)

Аввалроқ, Про лига доирасидаги “Яйпан” ва “Ғазалкент” жамоалари ўртасидаги баҳс якунида ҳакамдан норози мухлислар стадионга югуриб чиққани, шундан сўнг ўйин ҳакамлари таъқиб остида майдонни тарк этгани ҳақида хабар берилган эди. Мазкур ўйин юзасидан Ўзбекистон футбол ҳакамлари маркази эксперт ҳакамлар гуруҳи хулосаси эълон қилинди.

Унга кўра, Про лиганинг 6-туридан ўрин олган “Яйпан” – “Ғазалкент” учрашувидаги баҳсли вазият экспертлар томонидан кўриб чиқилган. Хулосада айтилишича, 80-дақиқада ҳужумчига нисбатан қўполлик содир этилганига қарамай, бош ҳакам томонидан қоидабузарлик белгиланмаган. Шунингдек, Рустам Чориев ўйин давомида бир қатор хатоларга йўл қўйиб, ўйин мувозанатини сақлай олмагани қайд этилган.

Шу тариқа эксперт ҳакамлар гуруҳи хулосаси билан Рустам Чориев вақтинчалик Суперлига ва Про лига учрашувларидан четлатилиши тўғрисида маълум қилинган.

Эслатиб ўтамиз, аввалроқ Ўзбекистон Суперлигасининг 6-туридан ўрин олган “Қўқон-1912” – “Насаф” (1:1) учрашувида ҳакамлар ўйин натижасига таъсир қиладиган қўпол хатога йўл қўйган эди.

Ойбек Рустамов