Жанубий Корея ҳам Украинага қурол бериши мумкин 

Украинанинг тинч аҳолисига жиддий хавф туғилган тақдирда, Жанубий Корея мамлакатга қурол етказиб беришни бошлаши мумкин. Бу ҳақда Жанубий Корея Президенти Юн Сок Ёл “Reuters”га берган интервьюсида маълум қилди.

“Агар халқаро ҳамжамият тоқат қила олмайдиган вазият юзага келса, масалан, тинч аҳолига кенг миқёсли ҳужумлар бўлса ёки уруш қонунлари жиддий бузилса, биз учун фақат гуманитар ёки молиявий ёрдам билан чекланиш қийин бўлади”, дейди Жанубий Корея Президенти. 

Айтиш жоизки, бу Жанубий Корея Президентининг Киевга қурол бериш мумкинлиги ҳақида илк баёнотидир. Юн Сок Ёлнинг сўзларига кўра, халқаро ҳуқуқ Украина мудофааси ва мамлакатнинг қайта тикланишини қўллаб-қувватлаш даражасини чекламайди. Жанубий Корея расмийлари эса уруш зонасидаги вазият ва можаро томонлари билан муносабатларнинг ривожланишини инобатга олган ҳолда энг мақбул чораларни кўради.

Сеул Киевга инсонпарварлик ёрдами, шунингдек, дубулға ва зирҳли нимчалар сингари ҳарбий буюмлар етказиб бермоқда. Пентагоннинг интернетда тарқалган ҳужжатларига кўра, Жанубий Корея етакчисининг ёрдамчилари Вашингтон кейинчалик Украинага юбориши мумкин бўлган ўқ-дориларни АҚШга етказиб бериш борасида иккиланиб турибди. Шунинг учун ҳам АҚШ Президенти Жо Байден Юн Сок Ёлга бевосита қўнғироқ қилиб, қурол етказиб беришни талаб қилиши кутилмоқда. Маълумотларга кўра, ҳозирда Сеул Вашингтон босими ва Жанубий Кореянинг уруш томонларига ҳалокатли қуроллар етказиб беришни тақиқловчи расмий сиёсати орасида қолиб кетган.

Бу хабарлар тарқалгач, Россия Хавфсизлик кенгаши раисининг ўринбосари Дмитрий Медведев душманларига ёрдам беришга тайёр янги давлат топилганидан норози бўлиб, Telegram-каналида кинояли пост қолдирган.

“Қизиқ, бу мамлакат аҳолиси энг яқин қўшнилари – КХДРдаги ҳамкорларимиздан Россия қуролларининг сўнгги намуналарини кўрганларида нима дейишади?”, деб ёзган Медведeв.