“Жамоадошларимга омад”. Роналду кутилмаганда терма жамоа базасини тарк этди

Португалия терма жамоаси етакчиси ва Саудия Арабистонининг “Ал-Наср” клуби ҳужумчиси Криштиану Роналду UEFA Миллатлар лигасининг 3-туридан ўрин олган Данияга қарши ўйин арафасида миллий терма жамоа қароргоҳини тарк этганини эълон қилди. Бу ҳақда у ўзининг Instagram’даги саҳифасида ёзди.

30 сентябрь куни 41 ёшли футболчи терма жамоа машғулотидан олдин Копенгагендаги “Паркен” стадионини тарк этганидан бир неча соат ўтиб, ўзининг Instagram саҳифасида баёнот эълон қилди.

“Терма жамоа бош мураббийининг матбуот анжуманидан сўнг ва Португалия Футбол Федерацияси президенти билан бўлиб ўтган суҳбат ортидан, миллий терма жамоа йиғинини тарк этишга қарор қилдим. Вақти келганда, ҳар доим боримни берган миллий терма жамоани тарк этишимга сабаб бўлган омиллар ҳақидаги ҳақиқатни барча португалияликларга айтиб бераман. Ҳозир эса Португалияга ва барча жамоадошларимга, истисносиз, омад тилаш вақти”, деб ёзди Роналду.

Шундай қилиб, жамоа сардори терма жамоанинг бўлажак ўйинида аниқ майдонга тушмайди. Шу билан бирга, Роналду ҳали терма жамоадаги фаолиятини якунлаганини эълон қилмади ва ўз қарорининг сабабларини кейинроқ очиқлашга ваъда берди.

Вазият Португалиянинг Норвегия устидан қозонилган 2:1 ҳисобидаги ғалабасидан кейин кескинлашди: Роналду бутун ўйинни захира ўриндиғида ўтказди, ҳакамнинг якуний ҳуштагидан сўнг кийиниш хонасига кириб кетди ва кейинчалик кетма-кет уч кун умумий гуруҳ билан машғулот ўтказмади. Федерация президенти Педру Проэнса эса вазиятни изга солиш учун  Копенгаленга етиб келган эди.

Икки турдан сўнг Португалия 6 очко билан Миллатлар лигасининг А4 гуруҳида биринчи ўринни эгаллаб турибди. Жезус шогирдлари навбатдаги ўйинни бугун, 1 октябрь куни Копенгагенда Данияга қарши Роналдусиз ўтказади.