Зеленскийнинг талаби билан Адлия вазири ишдан олинди

Бугун, 19 ноябрь куни Украина Олий Радаси Адлия вазирлиги раҳбари Герман Галушенкони лавозимидан бўшатиш учун овоз берди. Бу ҳақда ўз манбасига таяниб, РБК-Украина хабар берди.

Унинг истеъфосини қўллаб-қувватлаб 323 депутат овоз бергани айтилмоқда. Маълум қилинишича, бундан аввал Галушенко вазир сифатидаги мажбуриятларини бажаришдан четлаштирилган.

Нашр маълумотларига кўра, Украина Адлия вазири вазифаларини вақтинча Адлия вазирининг Европа интеграцияси бўйича ўринбосари Людмила Сугак бажаради.

Эслатиб ўтамиз, аввалроқ Украина Миллий коррупцияга қарши бюроси ва Махсус коррупцияга қарши прокуратура давлат компанияси ҳисобланувчи “Энергоатом”даги кенг кўламли коррупция схемасини фош этганини маълум қилганди.

Жорий йилнинг 10 ноябрь куни ҳуқуқ-тартибот органлари Галушенко ва тадбиркор Тимур Миндичнинг уйларида, шунингдек, “Энергоатом”да тинтув ўтказган. Бунинг ортидан Украина Президенти Владимир Зеленский Адлия вазири Герман Галушенко ва Энергетика вазири Светлана Гринчук истеъфосини талаб қилган. Унга кўра, Галушенко ва Гринчук ўз лавозимларида қолиши мумкин эмас. Шунингдек, қатор ОАВларда Президент Владимир Зеленский ҳам бизнесмен Тимур Миндичга оид терговда, коррупция схемалари бўйича ишда тилга олинаётгани ҳақида хабарлар пайдо бўлган.