Зеленский Европарламентда чиқиш қилди

Олам

image

Бугун, 9 февраль куни Брюсселга келган Украина Президенти Владимир Зеленский Европарламентда чиқиш қилди. Бу ҳақда “Euronews” хабар берди.

Қайд этилишича, Зеленскийнинг чиқиши олдидан Европарламент раҳбари Роберта Метсола кириш нутқини ўқиб, Украинанинг бутун қитъадаги барча халқларни боғлаб турган Европа қадриятлари учун курашдаги жасоратини олқишлаган.

Шунингдек, Метсола хоним Европа Иттифоқи раҳбарларини Украинага реконструкция учун маблағ ҳамда Россия босқинини қайтаришга кўпроқ оғир қуроллар, жумладан, узоқ масофали ракета тизимлар ва самолётлар билан таъминлашга чақирган.

“Бизнинг жавобимиз таҳдидга мутаносиб бўлиши керак, таҳдид эса ҳақиқийдир. Ортингизда биз бормиз. Қанча керак бўлса, шунча сиз билан бирга бўламиз. Эркинлик ғалаба қозонади, тинчлик ҳукм суради ва сиз ғалаба қозонасиз. Слава Украина!” деган Метсола хоним Зеленскийга қарата.

Шундан сўнг Президент Зеленский сўзга чиққан. Украина раҳбари парламентга уруш давомида доимий қўллаб-қувватлагани учун миннатдорлик билдирган. У Европа турмуш тарзига хос бўлган плюрализм, фикрлар хилма-хиллиги, тенглик, эркин намойиш ўтказиш ҳуқуқи ва бузилмайдиган ҳудудий чегаралар каби қадриятларни санаб ўтган. Уларнинг ҳаммаси бирлашиб, одамларда эртанги кунга ишонч ҳосил қилишини айтган.

“Бу бизнинг Европамиз, бу бизнинг қоидаларимиз, бу бизнинг ҳаёт тарзимиз. Украина учун эса бу уйга қайтиш йўлидир. Мен бу ерга халқимизнинг уйига қайтиш йўлини ҳимоя қилиш учун келдим”, деган Зеленский.

Унинг сўзларига кўра, Россия уруш орқали Европа турмуш тарзини йўқ қилишга уринмоқда. Владимир Зеленский Россияни Эрон каби диктатура тузумлари ёрдамида Европа қадриятларига қарши тўлиқ уруш олиб бораётганликда айблаган.

“Россия режими нафақат ҳар қандай турдаги ижтимоий адолат ва хилма-хилликдан нафратланади, балки улар ксенофобияга сармоя киритиб, уни нормал ҳолатнинг бир қисмига айлантиришга ҳаракат қилади. Қаерда яшамасак ҳам, фарзандларимиз ва набираларимиз орзулари рўёбга чиқишига доимо ишонамиз. Бунинг учун асосий шартлар тинчлик ва хавфсизликдир”, деган Украина раҳбари.

Шунингдек, Зеленский Европа Иттифоқининг барча 27 етакчисига олдинлари имконсиз ҳисобланган қарорлар чиқаргани учун миннатдорлик билдирган. У Европа ҳеч бўлмаганда Россия ёнилғисига ҳалокатли қарамликдан халос бўлаётганидан мамнунлигини айтган.

“Биз душман олдига қайтаётганимиз йўқ. Биз вақтни йўқотаётганимиз йўқ, балки ўзимизни ўзгартиряпмиз. Биз бирга эканмиз, Европа турмуш тарзини сақлаб қолар эканмиз, Европа ҳамиша Европа бўлиб қолади”, деган Зеленский.

Европарламентдаги чиқишдан сўнг Метсола хоним Зеленскийга Европа Иттифоқи байроғини топширган. Чиқиш охирида парламентда Украина мадҳияси янграган.

Алибек Бейжанов


Мақола муаллифи

avatar

.

Теглар

Владимир Зеленский Европарламент

Баҳолаганлар

0

Рейтинг

3

Мақолага баҳо беринг

Дўстларингиз билан улашинг