Зеленский Украинага қурол етказиб беришга тўсқинлик қилган Германиядан ўпкалади 

Украина Президенти Владимир Зеленский Германия НАТО орқали Киевга қурол етказиб беришга тўсқинлик қилганидан норозилигини билдирди. Бу ҳақда у Италиянинг “La Repubblica” нашрига берган интервьюсида маълум қилди.  

“Биз ҳар қандай сценарийга тайёрмиз. Буни, афсуски, Европанинг барча давлатлари ҳақида айтиб бўлмайди. Масалан, яқинда Германия НАТО орқали қурол етказиб берилишига тўсқинлик қилди”, деган Зеленский. 

У Киев бундай қуролларни сотиб олишга ҳақли эканлигига ишонч билдирган. 

“Урушнинг саккизинчи йилида бизнинг уларда ҳаққимиз йўқми? Кўриниб турибдики, биз ҳақмиз. Аммо баъзи пойтахтларда қўрқув ҳукмронлик қилишда давом этмоқда”, дея қўшимча қилган у. 

Берлиннинг рад этиши 

Жорий йилнинг 11 декабрь куни Украинанинг Германиядаги элчиси Андрей Мельник Украинанинг “Зеркало Недели” нашрига берган интервьюсида Германия ҳатто янги ҳукумат даврида ҳам Киевга қурол сотиш ниятида эмаслигини айтди. Унинг сўзларига кўра, Берлиннинг асосий норасмий аргументи шундан иборатки, қурол-яроғ етказиб бериш “Донбассдаги тўқнашув чизиғида янада кескинлашувни келтириб чиқариши мумкин”. Дипломат Берлиннинг бу қарорини “Иккинчи жаҳон урушидан кейин немис жамияти ДНКсининг бир қисми бўлган бузуқ пасифизм” билан боғлади. 

Шунингдек, Украина Ташқи ишлар вазири Дмитрий Кулеба Германия ҳукуматининг Киевга қурол етказиб беришдан бош тортишини сиёсий деб атади.