Зеленский Трампнинг ҳузурига боради

Жорий йилнинг 18 август куни Украина Президенти Владимир Зеленский Вашингтонда АҚШ Президенти Дональд Трамп билан учрашади. Бу ҳақда Украина Президенти Трамп билан бўлиб ўтган телефон суҳбатидан сўнг ўзининг Telegram-каналида маълум қилди.

“Можарони якунлаш бўйича барча тафсилотларни душанба куни Вашингтонда Президент Трамп билан муҳокама қилмоқчиман. Таклиф учун миннатдорман”, деб ёзди Зеленский.

Унинг сўзларига кўра, телефон суҳбати бир ярим соат давом этиб, мазмунли бўлган. Трамп унга Россия Президенти Владимир Путин билан ўтказилган музокараларнинг асосий жиҳатларини баён қилган.

“Биз Трампнинг Украина–Америка–Россия уч томонлама учрашуви ҳақидаги таклифини қўллаб-қувватлаймиз. Украина таъкидлайдики, асосий масалалар фақат етакчилар даражасида муҳокама қилиниши мумкин ва уч томонлама формат бунга мос келади”, дейди Зеленский.

Қайд этиш жоиз, уч томонлама саммит ўтказилиши эҳтимолини Трамп Путин билан Анкориждаги музокаралардан сўнг “Fox News”га берган интервьюсида тилга олган. АҚШ Президентининг иттифоқчиси, республикачи сенатор Линдси Грэм бундай учрашув туфайли ҳарбий можаро “Рождестводан анча олдин” якунланишига ишонч билдирди. Россия Президенти ёрдамчиси Юрий Ушаков эса Аляскада бу масала муҳокама қилинмаганини айтди.

Ҳам Путин, ҳам Трамп Анкориждаги музокаралардан сўнг “олдинга силжиш” ҳақида гапирган, бироқ тафсилотларни ошкор қилмаганди. Республика партияси вакилининг айтишича, томонлар “кўплаб масалалар” юзасидан, жумладан, Украина учун хавфсизлик кафолатлари бўйича келишувга эришган, аммо айрим мавзулар юзасидан муросага келинмаган. Шунингдек, АҚШ Президенти “Fox News”га берган интервьюсида қарорларнинг кўп жиҳатдан Зеленскийга боғлиқ эканини қайд этган.

Эслатиб ўтамиз, аввалроқ Дональд Трамп Аляскадан қайтаётганда украиналик мавқедоши Владимир Зеленский билан узоқ суҳбатлашгани хабар қилинганди.