Россия-Украина уруши Рождествогача якунланади – АҚШ сенатори

north_east

Трамп Аляскадан қайтаётганда Зеленский билан узоқ гаплашди

АҚШлик республикачи сенатор Линдси Грэмнинг фикрича, агар Россия, АҚШ ва Украина раҳбарлари уч томонлама учрашув ўтказса, Москва ва Киев ўртасидаги қуролли можаро яқин ойлар ичида тугаши мумкин. Бу ҳақда сенатор Х ижтимой тармоғида ёзиб қолдирди.

“Агар Президент Трамп, Зеленский ва Путин ўртасида уч томонлама учрашув ростдан ҳам ўтказилса, мен оптимизм билдираман – бу уруш Рождестводан анча олдин якунланади”, дея ёзган Грэм.

Сенаторнинг таъкидлашича, агар бундай учрашув бўлмаса, Трамп “охиригача бориб, арзон рус нефтини сотиб олаётганларни жазолаши” керак бўлади.

Сенатор илгари ҳам АҚШ Президенти можаро ҳал бўлмаган тақдирда Россиянинг савдо ҳамкорларига қарши санкциялар киритишдан бош тортмаслигига ишончини билдирган.

Грэм демократ сенатор Ричард Блументал билан бирга Россиянинг нефть ва газини сотиб олаётган давлатларга 500 фоизлик бож жорий этишни кўзда тутувчи қонун лойиҳасини тайёрлаган эди. Бу ҳужжат Сенатда кенг қўллаб-қувватланди, бироқ август таътили бошлангунига қадар юқори палата уни кўриб улгурмаган. Трамп ҳам Россия ва унинг савдо ҳамкорлари, жумладан Хитойга бож солиш билан таҳдид қилган, аммо Аляскадаги музокаралардан сўнг бу масалани “икки-уч ҳафта”га қолдиришини билдирган. Россия эса бундай санкцияларни ноқонуний деб ҳисоблайди.
Грэм учрашувда Россия ва Украина ўртасидаги можаро бўйича келишувга эришилмаганини тан олган, бироқ “асосий нуқталарда” силжиш бўлганини қайд этган (қайси нуқталар эканини очиқламади). “Fox News”га берган интервьюсида у Украина Президенти Владимир Зеленскийга “битимга рози бўлишни маслаҳат беришини”, лекин бунинг эҳтимолдан холи эмаслигини айтган.

Трамп эса Путин ва Зеленскийни ўз иштирокида учрашишга йиғишни режалаштираётганини ҳам маълум қилган. Аввалроқ АҚШ бу масалани Европа етакчилари, Украина ва Россия билан олиб борган музокараларда бир неча бор кўтарган эди. Россия Президенти ёрдамчиси Юрий Ушаковнинг сўзларига кўра, Аляскада уч томонлама саммит мавзуси муҳокама қилинмаган. Путин эса илгари Зеленский билан учрашув учун “алоҳида шароитлар” бўлиши зарурлигини айтган.

Маълумот учун, кеча, 15 август куни АҚШнинг Аляска штатида Трамп ва Путиннинг учрашуви бўлиб ўтди. Учрашув Тошкент вақти билан бугун, 16 август куни соат 04:25 да якунланди. Аляскада бўлиб ўтган музокаралар якунида Трамп ва Путин биргаликдаги матбуот анжуманида қатнашди.

Эслатиб ўтамиз, аввалроқ Украина Президенти Владимир Зеленскийнинг атрофидаги манбалар Россия раҳбари Владимир Путин ва АҚШ Президенти Дональд Трампнинг Аляскадаги учрашувини салбий баҳолаганди. Уларнинг фикрича, саммит якунида ҳеч қандай сезиларли ютуқ кузатилмаган. Украина Президентининг номи очиқланмаган бир ёрдамчиси вазиятни “жуда ғалати” деб атаган. Аммо учрашув якунида Путин ҳам, Трамп ҳам учрашув самарали бўлганини таъкидлади. Трамп матбуот анжуманида Путин билан яна “яқин кунларда” учрашиши мумкинлигини айтган. Путин эса кейинги манзил “Москва” бўлишини таклиф қилган.